ധോണിയെ ഫിനിഷറാക്കിയത് മീഡിയ; കോലിയോടും തര്‍ക്കിക്കാന്‍ മടിയില്ല: ഗൗതം ഗംഭീര്‍!

ധോണി ഫിനിഷറെന്ന് വെറുതെ പറയുന്നു

ധോണിയാണ് ഫിനിഷറെന്ന് വെറുതെ പറയുകയാണ്. മാധ്യങ്ങള്‍ തൂക്കിയിട്ടുകൊടുത്ത ഒരു ടാഗാണ് അത്. ഞാന്‍ പറയുകയാണെങ്കില്‍ വിരാട് കോലിയാണ് ടീമിലെ ഏറ്റവും മികച്ച ഫിനിഷര്‍ - ആജ് തക് സലാം ക്രിക്കറ്റില്‍ സംസാരിക്കവേ ഗൗതം ഗംഭീര്‍ പറഞ്ഞു.

ഫ്രണ്ട്ഷിപ്പിന് വേണ്ടിയല്ല കളി

ഞാനിവിടെ ഫ്രണ്ട്ഷിപ്പിന് വേണ്ടി കളിക്കാന്‍ നില്‍ക്കുന്ന ആളല്ല. ഇനിയും തര്‍ക്കിക്കേണ്ടി വന്നാല്‍ ഞാന്‍ ചെയ്യും. അത് അപ്പുറത്ത് ആരാണ് എന്ന് നോക്കിയല്ല. വിരാട് കോലിയായാലും പറയാനുള്ളത് പറയും.

ധോണി തീരുമാനിക്കട്ടെ

ഏത് പൊസിഷനില്‍ ബാറ്റ് ചെയ്യണം എന്ന് ധോണി തന്നെ തീരുമാനിക്കട്ടെ - ഗംഭീര്‍ പറഞ്ഞു. ബാറ്റിംഗ് ഓര്‍ഡറില്‍ മുന്നോട്ട് വരണമെന്ന് ധോണി പറയുന്നുണ്ടായിരുന്നു. ഏതാണ് ധോണിക്ക് നല്ലതെന്ന് ധോണി തന്നെയാണ് തീരുമാനിക്കേണ്ടത്.

ആറോ ഏഴോ ആണ് നല്ലത്

കാര്യങ്ങള്‍ ഇങ്ങനെയൊക്കെയാണെങ്കിലും എം എസ് ധോണി ആറാമതോ ഏഴാമതോ ഇറങ്ങുന്നതാണ് ടീമിന് നല്ലത് എന്ന അഭിപ്രായമാണ് ഗംഭീറിന്. ടീമിനോളം നന്നാവാനേ ഒരു ക്യാപ്റ്റന് കഴിയൂ എന്നും ഗംഭീര്‍ പറഞ്ഞു.

യുവരാജ് ഫോമിലാകണം

യുവരാജ് മികച്ച പ്രകടനം കാഴ്ചവെക്കണം എന്നാണ് ലോകകപ്പില്‍ ഇന്ത്യയുടെ സാധ്യതകളെക്കുറിച്ച് ചോദിച്ചപ്പോള്‍ ഗംഭീര്‍ പറഞ്ഞത്. കളിക്കളത്തിലെ വാക്കുതര്‍ക്കങ്ങള്‍ വ്യക്തിപരമായി എടുക്കരുത് എന്നാണ് തന്റെ അഭിപ്രായമെന്നും ഗംഭീര്‍ പറഞ്ഞു.