സ്പോര്ട്സ് ബൈക്കിനൊപ്പം സഞ്ജു
കറുപ്പ് ജാക്കറ്റണിഞ്ഞ് സ്പോര്ട്സ് ബൈക്കിന് അരികില് നില്ക്കുന്ന ഫോട്ടോയായിരുന്നു ഇന്സ്റ്റഗ്രാമിലൂടെ സഞ്ജു സാംസണ് പങ്കുവച്ചത്. ഇതിനു താഴെയായിരുന്നു വെസ്റ്റ് ഇന്ഡീസ് താരം കൂടിയായ ഷിംറോണ് ഹെറ്റ്മെയറുടെ ട്രോള്.
ലുക്ക് അത്ര മോശമില്ല. ആ മെഷീനൊപ്പം എന്തു ചെയ്യണമെന്നു നിനക്ക് അറിയുമെന്നു വിശ്വസിക്കുന്നുവെന്നായിരുന്നു ഹെറ്റ്മെയറുടെ പരിഹാസം.
പിന്നാലെ സഞ്ജുവിന്റെ മറുപടിയും വന്നു. ഹഹ, ഹെറ്റി... അടുത്ത തവണ നമ്മള് കണ്ടുമുട്ടുമ്പോള് നിന്നെ എന്ത് ചെയ്യണമെന്നു എനിക്കറിയാം എന്നാണ് കൈമുഷ്ടി ചുരുട്ടി ഇടിക്കുന്ന ഇമോജിയൊപ്പം സഞ്ജു കുറിച്ചത്.
ഒരു മല്സരം മാത്രം
ഈ വര്ഷം ഇന്ത്യക്കു വേണ്ടി ഒരേയൊരു മല്സരത്തില് മാത്രമേ സഞ്ജു സാംസണ് കളിച്ചിട്ടുള്ളൂ. കഴിഞ്ഞ മാസമാദ്യം നടന്ന ശ്രീലങ്കയ്ക്കെതിരായ ടി20 പരമ്പരയിലെ ആദ്യ മല്സരത്തിലായിരുന്നു ഇത്.
ഈ കളിയില് ഫീല്ഡ് ചെയ്യവെ ബൗണ്ടറി ലൈനിന് അരികില് വച്ച് സഞ്ജുവിന്റെ കാല്മുട്ടിന് പരിക്കേറ്റിരുന്നു. ഇതേ തുടര്ന്ന് ശേഷിച്ച രണ്ടു മല്സരങ്ങളും നഷ്ടമാവുകയും ചെയ്തു.
പരിക്കില് നിന്നു മോചിതനാവാന് വൈകിയതിനാല് ന്യൂസിലാന്ഡുമായുള്ള ഏകദിന പരമ്പരയിലേക്കും ഇപ്പോള് നടക്കുന്ന ടി20 പരമ്പരയിലേക്കും അദ്ദേഹം പരിഗണിക്കപ്പെട്ടില്ല. ഇനി ഐപിഎല്ലിനു മുമ്പ് ഓസ്ട്രേലിയക്കെതിരേ ടെസ്റ്റ്, ഏകദിന പരമ്പരകള് മാത്രമേ ഇന്ത്യ കളിക്കുന്നുള്ളൂ.
Also Read:IND vs NZ: ഹാര്ദിക് 'ബോസ്' കളിക്കുന്നോ? ഇങ്ങനെ പോയാല് ഇന്ത്യ തകരും! അറിയാം
ഐപിഎല് കിരീടം
വരാനിരിക്കുന്ന ഐപിഎല്ലില് വളരെ സന്തുലിതമായ, കെട്ടുറപ്പുള്ള സംഘത്തെയാണ് സഞ്ജു സാംസണിനു കീഴില് രാജസ്ഥാന് റോയല്സ് ഇറക്കുന്നത്. ഇത്തവണ രണ്ടാം കിരീടം ഉയര്ത്താമെന്ന പ്രതീക്ഷയില് തന്നെയാണ് റോയല്സ്.
കഴിഞ്ഞ തവണ സഞ്ജുവും സംഘവും കിരീടത്തിനു കൈയെത്തുംദൂരത്ത് വരെ എത്തിയിരുന്നു. ഫൈനലില് ഹാര്ദിക് പാണ്ഡ്യയുടെ ഗുജറാത്ത് ടൈറ്റന്സിനോടു റോയല്സ് പരാജയപ്പെടുകയായിരുന്നു. എങ്കിലും 2008ലെ പ്രഥമ സീസണിനു ശേഷം ടീമിനെ ഫൈനല് വരെയെത്തിച്ച ആദ്യ റോയല്സ് നായകനെന്ന നിലയില് സഞ്ജുവിന് തീര്ച്ചയായും അഭിമാനിക്കാം.
കഴിഞ്ഞ സീസണിലെ പ്രധാനപ്പെട്ട കളിക്കാരെയെല്ലാം റോയല്സ് പുതിയ സീസണിലേക്കു നിലനിര്ത്തിയിട്ടുണ്ട്. കൂടാതെ ലേലത്തില് ഒമ്പതു താരങ്ങളെ പുതുതായി വാങ്ങുകയും ചെയ്തു.