Click it and Unblock the Notifications
ക്രിക്കറ്റ് മൈതാനത്ത് ഏറ്റവും മികച്ച ഇരിപ്പിടമുള്ളത് വിക്കറ്റ് കീപ്പറിനാണെന്നാണ് പറയുന്നത്. അതുകൊണ്ട് തന്നെ മിക്കപ്പോഴും ബോളര്‍മാര്‍ക്ക് നിര്‍ദ്ദേശങ്ങള്‍ നല്‍കാന്‍ വിക്കറ്റിന് പിന്നില്‍ നില്‍ക്കുന്നവര്‍ക്ക് സാധിക്കാറുണ്ട്. വിക്കറ്റ് കീപ്പര്‍മാര്‍ നായകന്മാരാകുമ്പോഴുള്ള ഗുണവും ഇതാണ്. ഇന്നലത്തെ മത്സരത്തിലും അത്തരത്തിലൊരു സംഭവമുണ്ടായി. ശ്രീലങ്കന്‍ വിക്കറ്റ് കീപ്പര്‍ മിനോദ് ഭനുകയുടെ ബുദ്ധിയായിരുന്നു സഞ്ജുവിനെ പുറത്താക്കിയത്.
കളിയുടെ 19-ാം ഓവറിലാണ് സഞ്ജു പുറത്താകുന്നത്. സഞ്ജുവിന്റെ ഷോട്ട് മുന്‍കൂട്ടി കണ്ട് ബോളര്‍ക്ക് മിനോദ് നിര്‍ദ്ദേശം നല്‍കുകയായിരുന്നു. സഞ്ജു സ്‌റ്റെപ്പ് ഔട്ട് ചെയ്ത് കളിക്കുമെന്ന് മനസിലാക്കിയ മിനോദ് ബോളറോട് സിംഹളഭാഷയില്‍ സംസാരിക്കുകയായിരുന്നു. ഇതനുസരിച്ച് ബോളര്‍ പ്രവീണ്‍ ജയവിക്രമ പന്തെറിഞ്ഞു. പ്രതീക്ഷിച്ചത് പോലെ തന്നെ ഇറങ്ങിയടിക്കാന്‍ ശ്രമിച്ച സഞ്ജു ക്യാച്ച് നല്‍കി പുറത്താവുകയും ചെയ്തു. കവറില്‍ അവിഷ്‌കയുടെ കൈയ്യിലാണ് സഞ്ജുവിന്റെ ഇന്നിംഗ്‌സ് അവസാനിച്ചത്. 46 റണ്‍സെടുത്താണ് സഞ്ജു പുറത്തായത്.
അതേസമയം ഇന്നലത്തെ മത്സരം മൂന്ന് വിക്കറ്റിനാണ് ശ്രീലങ്ക ജയിച്ചത്. ഇന്ത്യ മുന്നോട്ട് വച്ച 226 റണ്‍സെന്ന വിജയലക്ഷ്യം ലങ്ക അനായാസം മറികടക്കുകയായിരുന്നു. അവിഷ്‌ക ഫെര്‍ണാണ്ടോയുടേയും ബനുക രാജപക്‌സെയുടേയും അര്‍ധ സെഞ്ചുറികളാണ് ലങ്കയ്ക്ക് വിജയം നേടിക്കൊടുത്തത്. എങ്കിലും പരമ്പര 2-1 ന് സ്വന്തമാക്കാന്‍ സാധിച്ചതിലും യുവതാരങ്ങള്‍ക്ക് അരങ്ങേറാനുള്ള അവസരം കൊടുത്തതിന്റെ പേരിലും ഇന്ത്യയ്ക്ക് അഭിമാനിക്കാം.
ഇന്ത്യയുടെ ശ്രീലങ്കന്‍ പര്യടനത്തിലെ ട്വന്റി-20 പരമ്പര നാളെ ആരംഭിക്കും. ഏകദിനത്തിലെ പരമ്പര നഷ്ടത്തിന്റെ ക്ഷീണം മാറ്റുകയായിരിക്കും ശ്രീലങ്കയുടെ ലക്ഷ്യം. അവസരം കാത്തു നില്‍ക്കുന്ന യുവതാരങ്ങള്‍ക്കും ട്വന്റി-20 പരമ്പര നിര്‍ണായകമാണ്. ഇന്ത്യന്‍ സമയം വൈകിട്ട് എട്ട് മണിക്കായിരിക്കും മത്സരം ആരംഭിക്കുക. വിക്കറ്റ് കീപ്പറുടെ റോളില്‍ സഞ്ജു ആയിരിക്കുമോ അതോ ഇഷാന്‍ കിഷന്‍ ആയിരിക്കുമോ എന്നാണ് ആരാധകര്‍ ഉറ്റു നോക്കുന്നത്. അതേസമയം മറ്റൊരു മലയാളി താരമായ ദേവ്ദത്ത് പടിക്കല്‍ ഇന്ത്യക്കായി അരങ്ങേറുമോ എന്നതും ആരാധകര്‍ ഉറ്റു നോക്കുന്നതാണ്.
സൂര്യ കുമാര്‍ യാദവ്, പൃഥ്വി ഷാ എന്നിവരെ ഇംഗ്ലണ്ടിനെതിരായ ടെസ്റ്റ് പരമ്പരയിലേക്ക് വിളിച്ചതിനാല്‍ പുതുമുഖങ്ങള്‍ക്ക് അവസരം ലഭിക്കുമെന്നാണ് കരുതുന്നത്. കഴിഞ്ഞ ദിവസം ഏകദിനത്തില്‍ അരങ്ങേറിയ ചേതന്‍ സക്കറിയയും അരങ്ങേറ്റത്തിനായി കാത്തിരിക്കുന്നുണ്ട്.
