നടരാജന്, വാഷിങ്ടണ്
തമിഴ്നാട്ടുകാരായ ടി നടരാജന്, വാഷിങ്ടണ് സുന്ദര് എന്നിവര്ക്കു അരങ്ങേറ്റ ടെസ്റ്റ് കൂടിയായിരുന്നു ഗാബയിലേത്. മാനസികമായി ബുദ്ധിമുട്ടുണ്ടാക്കുന്ന ബയോ ബബ്ളിനകത്തു കഴിഞ്ഞ ഐപിഎല് മുതല് തുടരുന്ന നടരാജനു പുതുതായി ജനിച്ച മകളെപ്പോലും നേരില് കാണാനായിട്ടില്ല. എന്നാല് നട്ടുവിന് ഇതിലൊന്നും പരാതിയോ, പരിഭവമോ ഇല്ല. ടീമിനായി കഴിവിന്റെ പരമാവധി താരം നല്കുകയും ചെയ്തു.
സുന്ദറിനും ഇതു സ്വപ്നതുല്യമായ അരങ്ങേറ്റമാണ്. ടി20 ടീമിന്റെ ചട്ടക്കൂടില് നിന്നും പുറത്തുവന്ന സുന്ദര് ടെസ്റ്റിലും തനിക്കു മികവ് പുലര്ത്താന് കഴിയുമെന്ന് ഈയൊരു ടെസ്റ്റിലൂടെ തെളിയിച്ചു. രവീന്ദ്ര ജഡേജയ്ക്കു പകരമാരെന്ന ഇന്ത്യയുടെ ചോദ്യത്തിനുള്ള ഉത്തരം കൂടിയാണ് താരം നല്കിയത്.
ശര്ദ്ദുലിനെ സഹായിച്ചത് സച്ചിന്
മുംബൈയ്ക്കു വേണ്ടി ആഭ്യന്തര ക്രിക്കറ്റില് കളിച്ചുകൊണ്ടിരുന്ന താക്കൂറിനും ടെസ്റ്റെന്നത് പുതിയ അനുഭവമായിരുന്നു. അതും ഏറെ വെല്ലുവിളിയുയര്ത്തുന്ന ഗാബയില് ബാറ്റിങിലും ബൗളിങിലും താരം കസറി. ഒരുപാട് പ്രതിസന്ധികളെ അതിജീവിച്ച് ക്രിക്കറ്റിലേക്കു വന്ന താരമാണ് താക്കൂര്.
തുടക്കകാലത്ത് മുന് ഇതിഹാസ താരം സച്ചിന് ടെണ്ടുല്ക്കറുടെ ഉപദേശമാണ് അദ്ദേഹത്തിനു പ്രചോദനമായിട്ടുള്ളത്. ഫാസ്റ്റ് ബൗളിങ് താക്കൂര് പഠിച്ചതാവട്ടെ മുന് ഇതിഹാസ പേസര് ജെഫ് തോംസണിന്റെ ശിക്ഷണത്തിലുമായിരുന്നു.
സെയ്നിയെ കൈപിടിച്ചുയര്ത്തിയത് ഗംഭീര്
സെയ്നിയും തുടക്കകാലത്ത് ഏറെ പ്രതിസന്ധികള് നേരിട്ട ക്രിക്കറ്ററാണ്. സര്ക്കാര് ഡ്രൈവറായിരുന്നു സെയ്നിയുടെ അച്ഛന്. സാമ്പത്തിക ബുദ്ധിമുട്ടുകളെ തുടര്ന്ന് സെയ്നി ടെന്നീസ് ബോള് ക്രിക്കറ്റ് കളിച്ചു കൊണ്ടാണ് മുന്നോട്ടു പോയിരുന്നത്. ഒരു മല്സരം കളിച്ചാല് താരത്തിനു ലഭിച്ചിരുന്നത് വെറും 300 രൂപയായിരുന്നു.
ഇന്ത്യയുടെ മുന് ഓപ്പണര് ഗൗതം ഗംഭീറാണ് സെയ്നിയുടെ പ്രതിഭ തിരിച്ചറിഞ്ഞ് സഹായവുമായി ആദ്യം രംഗത്തുവന്നത്. ഡല്ഹിക്കു വേണ്ടി റെഡ് ബോള് ക്രിക്കറ്റ് കളിക്കാന് സെയ്നിക്കു ഗംഭീര് അവസരമൊരുക്കി. അവിടെ നിന്നും തുടങ്ങിയ സെയ്നിയുടെ യാത്ര ഐപിഎല്ലിലും ഇപ്പോള് ടെസ്റ്റ് ടീമിലും എത്തിനില്ക്കുകയാണ്.
സിറാജാണ് ഹീറോ
പരമ്പരയില് ഇന്ത്യക്കു വേണ്ടി കൂടുതല് വിക്കറ്റുകളെടുത്ത സിറാജും ഇന്ത്യയുടെ അപ്രതീക്ഷിത ഹീറോയായി മാറിയ താരമാണ്. ഓട്ടോറിക്ഷ ഡ്രൈവറുടെ മകനില് നിന്നാണ് സിറാജ് ഇപ്പോള് അരങ്ങേറ്റ ടെസ്റ്റ് പരമ്പരയില് ഇന്ത്യയുടെ സെന്സേഷനായി തീര്ന്നിരിക്കുന്നത്. 2014ലായിരുന്നു അന്നത്തെ ഹൈദരാബാദ് ടീമിന്റെ കോച്ചും ഇപ്പോള് ഇന്ത്യയുടെ ബൗളിങ് പരിശീലകനുമായ ബി അരുണിനെ അവസരങ്ങള് തേടി സിറാജ് സമീപിക്കുന്നത്. നെറ്റ്സില് സിറാജിന്റെ പ്രകടനം അദ്ദേഹത്തെ ആകര്ഷിച്ചു. വ്യത്യസ്ത തലങ്ങളില് സിറാജിനു ഹൈദരാബാദ് ടീമിനു വേണ്ടി കളിക്കാന് അരുണ് അവസരം നല്കി.
ഓസ്ട്രേലിയക്കെതിരായ ഈ പരമ്പരയില് തീര്ത്തും അപ്രതീക്ഷിതായാണ് സിറാജിന് കളിക്കാന് അവസരം ലഭിച്ചത്. മുഹമ്മദ് ഷമി, ഉമേഷ് യാദവ് എന്നിവര് പരിക്കേറ്റ് പിന്മാറിയതോടെ മെല്ബണിലെ രണ്ടാം ടെസ്റ്റില് സിറാജിന് നറുക്കുവീണു. ഇതിനിടെ താരത്തിന്റെ അച്ഛന് ഇന്ത്യയില് വച്ചു മരിച്ചിരുന്നു. എന്നാല് ടീമിനൊപ്പം ഓസ്ട്രേലിയയില് ബയോ ബബ്ളിനകത്തായതിനാല് സിറാജിന് നാട്ടിലേക്കു മടങ്ങാനായില്ല. എങ്കിലും ഇന്ത്യക്കു വേണ്ടി മകന് ടെസ്റ്റില് കളിക്കണമെന്ന അച്ഛന്റെ ഏറ്റവും വലിയ സ്വപ്നം പേസര് നിറവേറ്റി.
സിഡ്നി, ഗാബ ടെസ്റ്റുകളില് കാണികളുടെ ഭാഗത്തു നിന്നും അധിക്ഷേപം നേരിട്ട താരം കൂടിയാണ് സിറാജ്. പക്ഷെ ഇതൊന്നും അദ്ദേഹത്തെ തളര്ത്തിയില്ല. രണ്ടാമിന്നിങ്സില് അഞ്ചു വിക്കറ്റുകള് കൊയ്ത് ഓസീസിന്റെ നടുവൊടിച്ചാണ് സിറാജ് കളിക്കളത്തില് മറുപടി നല്കിയത്.