Click it and Unblock the Notifications
വളരെ മികച്ച ബാറ്റിങ് ടെക്‌നിക്കായിരുന്നു ലക്ഷ്മണിന്റേതെന്നു ലീ ചൂണ്ടിക്കാട്ടി. വളരെ കടുപ്പവും, അതോടൊപ്പം മനോഹരവുമായ ബാറ്റിങ് ടെക്‌നിക്കായിരുന്നു ലക്ഷ്മണിന്റേത്. പന്തിനെ ഒരിക്കലും അദ്ദേഹം പേടിച്ചിരുന്നില്ല. കുറച്ചധികം സമയമെടുത്ത്, മനോഹരമായ ഫൂട്ട് മൂവ്‌മെന്റോടെയാണ് ലക്ഷമണ്‍ ഷോട്ടുകള്‍ കളിച്ചിരുന്നതെന്നും ലീ അഭിപ്രായപ്പെട്ടു.
ഓസീസിനെതിരേ 29 ടെസ്റ്റുകള്‍ കളിച്ച ലക്ഷ്മണ്‍ 49.61 ശരാശരിയില്‍ 2434 റണ്‍സ് നേടിയിട്ടുണ്ട്. ആറു സെഞ്ച്വറികളും ഇതിലുള്‍പ്പെടുന്നു. 2001ല്‍ കൊല്‍ക്കത്തയില്‍ നടന്ന ടെസ്റ്റില്‍ നേടിയ 281 റണ്‍സ് അദ്ദേഹത്തിന്റെ കരിയര്‍ ബെസ്റ്റാണ്. അന്നു ഫോളോഓണ്‍ നേരിട്ട ശേഷം ജയം നേടി ഇന്ത്യ ചരിത്രം കുറിക്കുകയും ചെയ്തിരുന്നു.
വളരെ പ്രത്യേകതയുള്ള ബാറ്റ്‌സ്മാന്‍മാരില്‍ ഒരാളായിരുന്നു ലക്ഷ്മണ്‍. സ്വതസിദ്ധമായ താളത്തില്‍ കളിക്കുമ്പോള്‍ അദ്ദേഹം ഒന്നും ശ്രദ്ധിക്കില്ല. എതിര്‍ ടീമിന്റെ ബൗളര്‍ ആരാണെന്നോ, എത്ര വേഗത്തിലാണ് അയാള്‍ ബൗള്‍ ചെയ്യുന്നതെന്നോ ലക്ഷ്മണ്‍ മുഖവിലയ്‌ക്കെടുക്കാറില്ല. എതിര്‍ ബൗളറെ പ്രവഹിക്കുന്നതില്‍ മാത്രമായിരിക്കും അദ്ദേഹത്തിന്റെ ശ്രദ്ധ. വളരെ ആസ്വദിച്ചാണ് ലക്ഷ്മണിനെതിരേ താന്‍ ബൗള്‍ ചെയ്തിട്ടുള്ളതെന്നും ലീ വിശദമാക്കി.
ടെസ്റ്റില്‍ മാത്രമല്ല ഏകദിനത്തിലും ഓസീസിനെതിരേ ലക്ഷ്മണ്‍ ശ്രദ്ധേയമായ പ്രകടനം നടത്തിയിട്ടുണ്ട്. 21 ഏകദിനങ്ങളില്‍ നിന്നും 46.18 ശരാശരിയില്‍ 733 റണ്‍സാണ് അദ്ദേഹം നേടിയത്.
കൊല്‍ക്കത്ത ടെസ്റ്റിലെ ഗംഭീര ഇന്നിങ്്‌സ് കൂടാതെ ഓസ്‌ട്രേലിയക്കെതിരേ എക്കാലവും ഓര്‍മിക്കപ്പെടുന്ന മറ്റൊരു മികച്ച ഇന്നിങ്‌സ് കൂടി ലക്ഷ്മണ്‍ കളിച്ചിട്ടുണ്ട്. 2003ല്‍ അഡ്‌ലെയ്ഡില്‍ നടന്ന ഇന്ത്യ- ഓസ്‌ട്രേലിയ ടെസ്റ്റിലായിരുന്നു ഇത്.
ഓസ്‌ട്രേലിയയുടെ ഒന്നാമിന്നിങ്‌സിലെ കൂറ്റന്‍ സ്‌കോറായ 556നു മറുപടിയില്‍ ഇറങ്ങിയ ഇന്ത്യ നാലു വിക്കറ്റിന് 85 റണ്‍സെന്ന നിലയില്‍ പതറവെയാണ് ലക്ഷ്മണ്‍ ക്രീസിലെത്തിയത്. രാഹുല്‍ ദ്രാവിഡിനെ കൂട്ടുപിടിച്ച് ലക്ഷ്മണ്‍ ടീമിനെ കരകയറ്റി. ദ്രാവിഡ് 233 റണ്‍സ് നേടിയപ്പോള്‍ ലക്ഷ്മണ്‍ 143 റണ്‍സും നേടിയിരുന്നു. ഈ ടെസ്റ്റില്‍ ഇന്ത്യ ജയിക്കുകയും ചെയ്തിരുന്നു.
