വൈഭവിനെ പൂട്ടാൻ ഇം​ഗ്ലണ്ട് റെഡി,പ്ലാൻ വ്യക്തമാണ്!അരങ്ങേറ്റത്തിന് മുമ്പേ വണ്ടർ കിഡിന് മുന്നറിയിപ്പ്!

ഇന്ത്യക്കെതിരെയുള്ള ആദ്യ ടി20 മത്സരത്തിന് മണിക്കൂറുകൾ മാത്രം ബാക്കിനിൽക്കെ, ഇന്ത്യൻ ക്രിക്കറ്റിലെ പുതിയ ബാറ്റിംഗ് വിസ്മയം വൈഭവ് സൂര്യവംശിക്ക് കടുത്ത മുന്നറിയിപ്പുമായി ഇംഗ്ലണ്ട് ക്യാപ്റ്റൻ ഹാരി ബ്രൂക്ക്. ജൂലൈ 1-ന് ഡർഹാമിൽ ആരംഭിക്കുന്ന അഞ്ച് മത്സരങ്ങളുടെ ടി20 പരമ്പരയിൽ, കൗമാര താരം വൈഭവ് ഇന്ത്യക്കായി അന്താരാഷ്ട്ര അരങ്ങേറ്റം കുറിക്കുമെന്നാണ് പ്രതീക്ഷിക്കപ്പെടുന്നത്. താരം ഇതുവരെ ഇന്ത്യക്കായി പാഡ് കെട്ടിയിട്ടില്ലെങ്കിലും, ഐപിഎൽ 2026-ലെ മിന്നും പ്രകടനത്തിലൂടെ ഇതിനകം തന്നെ ഇംഗ്ലീഷ് ക്യാമ്പിന്റെ ഉറക്കം കെടുത്താൻ വൈഭവിന് സാധിച്ചിട്ടുണ്ട്.

മത്സരത്തിന് മുന്നോടിയായുള്ള വാർത്താസമ്മേളനത്തിൽ ഹാരി ബ്രൂക്ക് വൈഭവിന്റെ പ്രതിഭയെ പ്രശംസിച്ചെങ്കിലും, താരത്തെ പൂട്ടാനുള്ള വ്യക്തമായ തന്ത്രങ്ങൾ തങ്ങളുടെ പക്കലുണ്ടെന്ന് പരസ്യമായി വ്യക്തമാക്കി. ഹാരി ബ്രൂക്ക് പറഞ്ഞത്: "വൈഭവ് സൂര്യവംശി അങ്ങേയറ്റം പ്രതിഭയുള്ള ബാറ്ററാണെന്ന് ഉറപ്പാണ്. സമീപകാല ഐപിഎല്ലിൽ അവൻ കളിച്ച രീതി എല്ലാവരുടെയും ശ്രദ്ധ ആകർഷിച്ചിട്ടുണ്ട്. പക്ഷേ ഞങ്ങൾ അതിൽ ആശങ്കാകുലരല്ല, അവനെ തളയ്ക്കാനുള്ള കൃത്യമായ പദ്ധതികൾ ഞങ്ങളുടെ പക്കൽ തയ്യാറാണ്."

ഷോർട്ട് ബോൾ ചലഞ്ച് ഏറ്റെടുത്ത് വൈഭവ്; നെറ്റ്സിൽ വിയർപ്പൊഴുക്കി താരം

ഇംഗ്ലീഷ് പേസർമാർ തനിക്കെതിരെ ഷോർട്ട് ബോളുകൾ എറിഞ്ഞ് പരീക്ഷിക്കാൻ സാധ്യതയുണ്ടെന്ന് മനസ്സിലാക്കിയ വൈഭവ് സൂര്യവംശി, ഡർഹാമിലെ നെറ്റ്സിൽ കടുത്ത പരിശീലനത്തിലാണ്. റിവ്‌സ്‌പോർട്‌സ് റിപ്പോർട്ട് പ്രകാരം, ഡർഹാമിലെ പുല്ലുനിറഞ്ഞ പിച്ചിൽ ഇന്ത്യൻ ടീമിന്റെ ത്രോഡൗൺ സ്പെഷ്യലിസ്റ്റ് രഘുവിനെതിരെ താരം സ്ലെഡ്ജ്-ഹാമർ ഷോർട്ട് ബോളുകൾ നേരിട്ടാണ് പരിശീലിച്ചത്.

ആദ്യം മലയാളി താരം സഞ്ജു സാംസണൊപ്പം പ്രധാന വിക്കറ്റിൽ 45 മിനിറ്റോളം ബാറ്റ് ചെയ്ത വൈഭവ്, അതിനുശേഷവും പരിശീലനം അവസാനിപ്പിക്കാൻ തയ്യാറായില്ല. പ്രത്യേക നെറ്റ്സിലേക്ക് മാറിയ താരം അതിവേഗത്തിൽ വരുന്ന, ഉയർന്നുപൊങ്ങുന്ന പന്തുകൾ ഡിഫൻഡ് ചെയ്യാനും പുൾ ഷോട്ടുകൾ കളിക്കാനുമാണ് കൂടുതൽ സമയവും നീക്കിവെച്ചത്. ഇംഗ്ലണ്ടിലെ വേഗതയേറിയ പിച്ചുകളിൽ ഷോർട്ട് ബോളുകൾ നേരിടുക എന്നത് ഏത് ഏഷ്യൻ ബാറ്റർമാർക്കും വെല്ലുവിളിയാണ്. എന്നാൽ ഈ കൗമാരതാരം കഠിനാധ്വാനത്തിലൂടെ ആ പോരായ്മ പരിഹരിക്കാനുള്ള ശ്രമത്തിലാണ്.

ബെൻ സ്റ്റോക്സിന് പകരക്കാരനായി ഹാരി ബ്രൂക്ക്?

ഇതിനിടെ ഇംഗ്ലണ്ട് ക്രിക്കറ്റിൽ നിന്നും മറ്റൊരു വലിയ വാർത്ത കൂടി പുറത്തുവരുന്നുണ്ട്. സൂപ്പർ താരം ബെൻ സ്റ്റോക്സ് അന്താരാഷ്ട്ര ക്രിക്കറ്റിൽ നിന്നും വിരമിക്കൽ പ്രഖ്യാപിച്ചതിന് പിന്നാലെ, ഇംഗ്ലണ്ടിന്റെ അടുത്ത ടെസ്റ്റ് ക്യാപ്റ്റനായി ഹാരി ബ്രൂക്കിനെ പരിഗണിക്കുന്നതായാണ് സൂചനകൾ. സ്റ്റോക്സ് തന്നെ ബ്രൂക്കിനെ പിന്തുണച്ച് രംഗത്തെത്തിയിരുന്നു. സെലക്ടർമാർ ആവശ്യപ്പെട്ടാൽ മൂന്ന് ഫോർമാറ്റിലും ഇംഗ്ലണ്ടിനെ നയിക്കാൻ താൻ തയ്യാറാണെന്ന് വൈറ്റ് ബോൾ ക്യാപ്റ്റൻ കൂടിയായ ഹാരി ബ്രൂക്ക് വ്യക്തമാക്കി.

അതേസമയം, ഇന്ത്യക്കെതിരായ ആദ്യ ടി20 മത്സരത്തിനുള്ള തങ്ങളുടെ പ്ലേയിംഗ് ഇലവനെ ഇംഗ്ലണ്ട് പ്രഖ്യാപിച്ചു കഴിഞ്ഞു. മുൻ നായകൻ ജോസ് ബട്ലർ തന്നെയായിരിക്കും ഇംഗ്ലണ്ടിനായി ഇന്നിങ്സ് ഓപ്പൺ ചെയ്യുക. ഇന്ത്യ തങ്ങളുടെ പ്ലേയിംഗ് ഇലവൻ ഔദ്യോഗികമായി പ്രഖ്യാപിച്ചിട്ടില്ലെങ്കിലും, അഭിഷേക് ശർമയ്ക്ക് പകരം വൈഭവ് സൂര്യവംശി ഓപ്പണറായി സഞ്ജുവിനൊപ്പം ഇറങ്ങുമെന്ന സൂചനകളാണ് നെറ്റ്സ് പരിശീലനം നൽകുന്നത്.