ടി20 യിലെ നാണക്കേടിന് ഇംഗ്ലണ്ടിനോട് പ്രതികാരം ചെയ്യാം! ഏകദിന പരമ്പര തൂത്തുവാരും, പ്രവചനവുമായി ഹനുമ വിഹാരി!

ഇംഗ്ലണ്ടിനെതിരായ ഒന്നാം ഏകദിനത്തിലെ തകർപ്പൻ വിജയത്തിന് പിന്നാലെ, മൂന്ന് മത്സരങ്ങളടങ്ങിയ പരമ്പരയുടെ ഫലം പ്രവചിച്ച് ഇന്ത്യൻ താരം ഹനുമ വിഹാരി. ട്വന്റി-20 പരമ്പരയിൽ ഏറ്റ 0-4 ന്റെ കനത്ത തോൽവിക്ക് ശേഷം ഏകദിനത്തിൽ ഇന്ത്യ തിരിച്ചു വന്നത് ഹെഡ് കോച്ച് ഗൗതം ഗംഭീറിന് വലിയൊരു ആശ്വാസമായിരിക്കുമെന്നും വിഹാരി വിലയിരുത്തി. തന്റെ യൂട്യൂബ് ചാനലിൽ പങ്കുവെച്ച വീഡിയോയിലൂടെയാണ് വിഹാരി പരമ്പരയെക്കുറിച്ചുള്ള നിരീക്ഷണങ്ങൾ പങ്കുവെച്ചത്.

ഗംഭീറിന് വലിയ ആശ്വാസം; 3-0 ന് ജയിക്കാനും സാധ്യത

പരമ്പര തുടങ്ങുന്നതിന് മുൻപ് ഇന്ത്യ 2-1 ന് ജയിക്കുമെന്നാണ് താൻ പ്രവചിച്ചതെന്നും എന്നാൽ ഒന്നാം ഏകദിനത്തിലെ പ്രകടനം കണ്ടതിന് ശേഷം ഇന്ത്യയ്ക്ക് ഇംഗ്ലണ്ടിനെ വൈറ്റ് വാഷ് (3-0) ചെയ്യാനുള്ള സാധ്യതയുണ്ടെന്നും വിഹാരി പറഞ്ഞു:

"ടി20 പരമ്പരയിൽ ഇംഗ്ലണ്ട് ഇന്ത്യയെ വൈറ്റ് വാഷ് ചെയ്തതുപോലെ, ഏകദിന പരമ്പരയിൽ ഇംഗ്ലണ്ടിനെ തിരിച്ച് വൈറ്റ് വാഷ് ചെയ്യാൻ ഇന്ത്യയ്ക്ക് മികച്ച അവസരമുണ്ട്. ഈ വിജയം ഇന്ത്യൻ ക്യാമ്പിൽ, പ്രത്യേകിച്ച് കോച്ച് ഗൗതം ഗംഭീറിന് വലിയൊരു ആശ്വാസം നൽകും. ഞാൻ ഇപ്പോഴും ഇന്ത്യ 2-1 ന് ജയിക്കുമെന്ന പ്രവചനത്തിൽ ഉറച്ചുനിൽക്കുന്നു, എങ്കിലും 3-0 എന്ന സ്കോറിനാണ് സാധ്യത കൂടുതൽ."

രോഹിത് ശർമ്മയും വിരാട് കോഹ്‌ലിയും പവർപ്ലേയിൽ തന്നെ പുറത്തായിട്ടും സമ്മർദ്ദമില്ലാതെ 75 പന്തിൽ 80 റൺസ് നേടി ടീമിനെ മുന്നിൽ നിന്ന് നയിച്ച ക്യാപ്റ്റൻ ശുഭ്മൻ ഗില്ലിന്റെ ഇന്നിങ്സിനെ വിഹാരി പ്രശംസിച്ചു. വിദേശമണ്ണിൽ കളിക്കുമ്പോൾ കാണിക്കേണ്ട മികച്ച ബാറ്റിങ് ശൈലിയാണ് ഗിൽ പുറത്തെടുത്തതെന്നും അദ്ദേഹം കൂട്ടിച്ചേർത്തു.

ടി20 യേക്കാൾ സന്തുലിതം ഏകദിന ടീം; ഗില്ലിന് ബുംറയുടെ പിന്തുണ

നിലവിലെ ഇന്ത്യൻ ട്വന്റി-20 ടീമിനേക്കാൾ കൂടുതൽ സന്തുലിതവും സ്ഥിരതയുള്ളതുമാണ് ഏകദിന ടീമെന്ന് വിഹാരി അഭിപ്രായപ്പെട്ടു. ഇന്ത്യ അടുത്തിടെ ടി20 ലോകകപ്പ് നേടിയവരാണെങ്കിലും, ശ്രേയസ് അയ്യർ പുതിയ ക്യാപ്റ്റനായി വന്നതോടെ ആ ടീം വീണ്ടും കെട്ടിപ്പടുക്കാൻ സമയമെടുക്കും. ടി20 പരമ്പരയിൽ ജസ്പ്രീത് ബുംറ, ഹാർദിക് പാണ്ഡ്യ എന്നിവരുടെ അഭാവം ശ്രേയസിന് തിരിച്ചടിയായിരുന്നു. എന്നാൽ ഏകദിന ടീമിൽ ഗില്ലിന് കീഴിൽ ബുംറയെപ്പോലെയുള്ള സീനിയർ താരങ്ങൾ കളിക്കുന്നത് ക്യാപ്റ്റന് ലഭിക്കുന്ന വലിയൊരു അനുഗ്രഹമാണെന്നും വിഹാരി ചൂണ്ടിക്കാട്ടി.

പരമ്പരയിലെ രണ്ടാം ഏകദിന മത്സരം ഇന്ന് (ജൂലൈ 16 വ്യാഴാഴ്ച) കാർഡിഫിൽ നടക്കും. ഈ മത്സരത്തിലും വിജയിച്ച് പരമ്പര സ്വന്തമാക്കാനുറച്ചാകും ശുഭ്മൻ ഗില്ലും സംഘവും ഇന്നിറങ്ങുക. എന്നാൽ ഒന്നാം ഏകദിനത്തിൽ സ്വന്തം മണ്ണിൽ തോൽക്കേണ്ടി വന്നതിന്റെ ക്ഷീണം ഇം​ഗ്ലണ്ടിന് നല്ലത് പോലെയുണ്ട്. അത് തീർക്കാൻ അവർ ഏതറ്റം വരെയും പോകും. വാശിയേറിയ ഈ പോരാട്ടം കാണാനാണ് ക്രിക്കറ്റ് ലോകം ഇപ്പോൾ ഉറ്റുനോക്കുന്നത്.