ആദ്യ ഇന്നിങ്‌സില്‍ നാല് റണ്‍സ്, രണ്ടാമിന്നിങ്‌സില്‍ ലോകറെക്കോഡ്, ഇവന്‍ പുലിയല്ല പുപ്പുലി

117 വര്‍ഷം ഇളകാതെനിന്ന ലോകറെക്കോഡാണ് ഗോഹലിനു മുന്നില്‍ വഴിമാറിയത്. 1989ല്‍ ഇംഗ്ലണ്ടിലെ ഓവല്‍ ഗ്രൗണ്ടില്‍ സോമര്‍സെറ്റിനെതിരേ സറേ ടീമിനു വേണ്ടി ഓപണര്‍ ബോബി ആബെല്‍ നേടിയ 357 റണ്‍സാണ് തിരുത്തപ്പെട്ടത്.

തന്‍റെ ഇന്നിങ്‌സ് ലോകറെക്കോഡാണെന്ന് അറിയില്ലായിരുന്നുവെന്നു മല്‍സരശേഷം ഗോഹല്‍ പ്രതികരിച്ചു. കഴിയുന്നത്ര നേരം ബാറ്റ് ചെയ്യുക മാത്രമായിരുന്നു ലക്ഷ്യം. ലോകറെക്കോഡ് കുറിക്കാനായതില്‍ സന്തോഷമുണ്ടെന്നും താരം കൂട്ടിച്ചേര്‍ത്തു.

26 കാരനായ ഗോഹല്‍ 723 പന്തുകളില്‍ നിന്നാണ് പുറത്താവാതെ 359 റണ്‍സ് അടിച്ചെടുത്തത്. ഇതില്‍ 45 ബൗണ്ടറികളും ഒരു സിക്‌സറും ഉള്‍പ്പെട്ടിരുന്നു.

ഒഡീഷയ്‌ക്കെതിരായ കളിയുടെ ഒന്നാമിന്നിങ്‌സിലെ ദയനീയ പ്രകടനത്തിന് രണ്ടാമിന്നിങ്‌സില്‍ ലോകറെക്കോഡോടെയാണ് ഗോഹല്‍ മറുപടി നല്‍കിയത്. ആദ്യ ഇന്നിങ്‌സില്‍ നാലു റണ്‍സെടുക്കാനേ താരത്തിനു കഴിഞ്ഞിരുന്നുള്ളൂ.

ഗോഹലിന്‍റെ കന്നി ട്രിപ്പിള്‍ സെഞ്ച്വറി നേട്ടം കൂടിയാണ് ഈ മല്‍സരത്തിലേത്. ഈ സീസണിലെ രഞ്ജി ട്രോഫില്‍ ആകെ ഇതു വരെ അഞ്ചു ട്രിപ്പിളുകള്‍ പിറന്നു കഴിഞ്ഞു.

ഈ ഇന്നിങ്‌സിനു മുമ്പ് ഗോഹലിന്‍റെ കരിയറിലെ ഏറ്റവും വലിയ സ്‌കോര്‍ 104 റണ്‍സായിരുന്നു. 27 മല്‍സരങ്ങളില്‍ നിന്നായി രണ്ടു സെഞ്ച്വറികള്‍ താരത്തിന്റെ അക്കൗണ്ടിലുണ്ട്.

മല്‍സരം സമനിലയില്‍ കലാശിച്ചെങ്കിലും ആദ്യ ഇന്നിങ്‌സില്‍ നേടിയ മികച്ച ലീഡിന്റെ മികവില്‍ ഗുജറാത്ത് സെമി ഫൈനലില്‍ ഇടംപിടിച്ചു.