ഐഎഎസും പിഎച്ച്ഡിയും നേടിയ ഇന്ത്യൻ ക്രിക്കറ്റർമാർ, കളിക്കളത്തിലെ ഈ 'വിദ്യാസമ്പന്നരെ' അറിയാമോ?

ക്രിക്കറ്റ് ഇന്ത്യയിൽ ഒരു വികാരമാണ്. മിക്ക കുട്ടികളും തങ്ങളുടെ പ്രിയപ്പെട്ട താരങ്ങളുടെ ആക്ഷനുകൾ അനുകരിച്ചാണ് വളരുന്നത്. സച്ചിൻ മുതൽ വൈഭവ് സൂര്യവംശി വരെ ഇന്ത്യൻ ആരാധകരുടെ മനസ് തൊട്ടത് വളരെ പെട്ടന്നായിരുന്നു. കായിക രംഗത്ത് ശോഭിക്കുമ്പോൾ താരങ്ങൾക്ക് പലപ്പോഴും പഠനം പാതിവഴിയിൽ ഉപേക്ഷിക്കേണ്ടി വരാറുണ്ട്. എന്നാൽ കളിക്കളത്തിലെ മികവിനൊപ്പം അക്കാദമിക് തലത്തിലും വെന്നിക്കൊടി പാറിച്ച ഒരുപാട് താരങ്ങൾ നമ്മുടെ ഇന്ത്യൻ ക്രിക്കറ്റിലുണ്ട്. അത്തരത്തിൽ മികവ് തെളിയിച്ച അഞ്ച് ഇന്ത്യൻ താരങ്ങൾ ഇവരാണ്:

1. അവിഷ്കാർ സാൽവി - പിഎച്ച്ഡി ഇൻ ആസ്ട്രോഫിസിക്സ് (PhD in Astrophysics)

ഇന്ത്യയ്ക്കായി 4 അന്താരാഷ്ട്ര മത്സരങ്ങൾ മാത്രം കളിച്ച, റൈറ്റ് ആം മീഡിയം പേസറും റൈറ്റ് ഹാൻഡ് ബാറ്ററുമായ അവിഷ്കാർ സാൽവിക്ക് മറ്റൊരു അപൂർവ്വ റെക്കോർഡുണ്ട്. ആസ്ട്രോഫിസിക്സിൽ (ജ്യോതിർഭൗതികം) പിഎച്ച്ഡി നേടിയ താരമാണ് അദ്ദേഹം. ബഹിരാകാശ ഗവേഷണങ്ങളും ഖഗോള മാറ്റങ്ങളും നിരീക്ഷിക്കുന്ന ഈ വിഷയത്തിൽ ഡോക്ടറേറ്റ് നേടുക എന്നത് അങ്ങേയറ്റം ശ്രമകരമായ ഒന്നാണ്.

2. അമയ് ഖുറാസിയ - ഐഎഎസ് (Cleared UPSC IAS Exam)

ഇന്ത്യൻ ക്രിക്കറ്റ് ചരിത്രത്തിൽ ഐഎഎസ് (UPSC) പരീക്ഷ പാസായ ഒരേയൊരു താരം അമയ് ഖുറാസിയയാണ്. ഇന്ത്യൻ ടീമിലേക്ക് തിരഞ്ഞെടുക്കപ്പെടുന്നതിന് മുൻപ് തന്നെ അദ്ദേഹം ഐഎഎസ് കരസ്ഥമാക്കിയിരുന്നു. 12 ഏകദിന മത്സരങ്ങളിൽ ഇന്ത്യയെ പ്രതിനിധീകരിച്ച അദ്ദേഹം നിലവിൽ ഇന്ത്യൻ കസ്റ്റംസ് ആൻഡ് സെൻട്രൽ എക്സൈസ് ഡിപ്പാർട്ട്മെന്റിൽ ഇൻസ്പെക്ടറായി സേവനമനുഷ്ഠിക്കുന്നു. മാത്രമല്ല, കേരള ക്രിക്കറ്റ് ടീം കോച്ചായും അദ്ദേഹം സേവനം അനുഷ്ഠിച്ചിട്ടുണ്ട്

3. അനിൽ കുംബ്ലെ - മെക്കാനിക്കൽ എൻജിനീയർ (Mechanical Engineer)

ഇന്ത്യയുടെ എക്കാലത്തെയും മികച്ച വിക്കറ്റ് വേട്ടക്കാരനായ അനിൽ കുംബ്ലെ കളിക്കളത്തിൽ കാണിച്ച അതേ ഏകാഗ്രത പഠനത്തിലും പുലർത്തിയിരുന്നു. ബംഗളൂരുവിലെ രാഷ്ട്രീയ വിദ്യാലയ കോളേജ് ഓഫ് എൻജിനീയറിംഗിൽ നിന്ന് മെക്കാനിക്കൽ എൻജിനീയറിംഗിൽ ബിരുദം നേടിയ താരമാണ് 'ജംബോ'.

4. ജവഗൽ ശ്രീനാഥ് - ബി.ടെക് ഇൻ ഇൻസ്ട്രുമെന്റൽ ടെക്നോളജി (B.Tech in Instrumentation)

ഇന്ത്യൻ പേസ് ബൗളിംഗിന്റെ കുന്തമുനയായിരുന്ന ജവഗൽ ശ്രീനാഥ് ഒരു എൻജിനീയറിംഗ് ബിരുദധാരിയാണ്. മൈസൂരിലെ എസ്.ജെ.സി.ഇയിൽ നിന്ന് ഇൻസ്ട്രുമെന്റൽ ടെക്നോളജിയിൽ ബി.ടെക് നേടിയ താരം നിലവിൽ ഐസിസി മാച്ച് റഫറിയായി പ്രവർത്തിക്കുന്നു.

5. മുരളി വിജയ് - പിജി ഇൻ ഇക്കണോമിക്സ് (Post Graduate in Economics)

തമിഴ്‌നാട് സ്വദേശിയായ മുരളി വിജയ് ബാറ്റിംഗിലെ പവർ ഹിറ്റിംഗിന് മാത്രമല്ല, അക്കാദമിക് മികവിനും പേരുകേട്ടയാളാണ്. എസ്ആർഎം യൂണിവേഴ്സിറ്റിയിൽ നിന്ന് സാമ്പത്തിക ശാസ്ത്രത്തിൽ (Economics) ബിരുദാനന്തര ബിരുദം നേടിയ ശേഷമാണ് വിജയ് ക്രിക്കറ്റിൽ സജീവമായത്.