ഗംഭീര്-ധോണി കൂട്ടുകെട്ട്
മുംബൈയിലെ വാംഖഡെ സ്റ്റേഡിയത്തില് നടന്ന ഫൈനലില് ആദ്യം ബാറ്റ് ചെയ്ത ലങ്ക ആറു വിക്കറ്റിന് 274 റണ്സാണ് നേടിയത്. മറുപടിയില് ഗംഭീര്-ധോണി സഖ്യം നാലാം വിക്കറ്റില് ചേര്ന്നെടുത്ത 109 റണ്സാണ് ഇന്ത്യന് വിജയത്തിന് അടിത്തറയിട്ടത്. 10 പന്തും ആറു വിക്കറ്റും ബാക്കിനില്ക്കെ ഇന്ത്യ ലക്ഷ്യത്തിലെത്തുകയായിരുന്നു.
ഗംഭീര് 97 റണ്സിന് പുറത്തായപ്പോള് ധോണി 91 റണ്സോടെ പുറത്താവാതെ നിന്നു. സിക്സറിലൂടെയായിരുന്നു ധോണി ഇന്ത്യയുടെ വിജയറണ്സ് നേടിയത്.
ധോണിയുടെ ഓര്മപ്പെടുത്തല്
97 റണ്സില് വച്ച് ബൗള്ഡായാണ് ഗംഭീര് ക്രീസ് വിട്ടത്. അന്നു തനിക്കു സെഞ്ച്വറി എങ്ങനെയാണ് നഷ്ടമായതെന്നു പലപ്പോഴും ആലോചിക്കാറുണ്ടെന്നു ഗംഭീര് പറയുന്നു. അന്ന് സ്വന്തം സ്കോര് എത്രയായെന്നു ആലോചിച്ചിരുന്നില്ല. ലങ്ക ഉയര്ത്തിയ വിജയലക്ഷ്യം മാത്രമായിരുന്നു മനസ്സിലുണ്ടായിരുന്നത്. ക്രീസില് അന്ന് ഒപ്പമുണ്ടായിരുന്നത് ധോണിയായിരുന്നു. ഒരോവര് പൂര്ത്തിയായ ശേഷം സെഞ്ച്വറിക്കായി മൂന്ന് റണ്സ് കൂടി മതി, അത് നേടി സെഞ്ച്വറി തികയ്ക്കാന് ശ്രമിക്കൂയെന്ന് ധോണി തന്നോടു പറഞ്ഞതായും ഗംഭീര് വെളിപ്പെടുത്തി
ബന്ധത്തില് വിള്ളല്
2011ലെ ലോകകപ്പിനു ശേഷമാണ് ഗംഭീറും ധോണിയും തമ്മിലുള്ള ബന്ധത്തില് വിള്ളല് വീഴുന്നത്. വൈകാതെ ഗംഭീര് ടീമില് നിന്നു പുറത്താവുകയും ചെയ്തു. പിന്നീട് ടീമിലേക്കൊരു തിരിച്ചുവരവ് ഐസിസിയുടെ മുന് ടെസ്റ്റ് പ്ലെയര് ഓഫ് ദി ഇയര് കൂടിയായ ഗംഭീറിനുണ്ടായിരുന്നില്ല.
ദിവസങ്ങള്ക്കു മുമ്പ് 2012ല് ഓസ്ട്രേലിയയില് നടന്ന ത്രിരാഷ്ട്ര പരമ്പരയിലെ ധോണിയുടെ റൊട്ടേഷന് പരീക്ഷണത്തെ ഗംഭീര് വിമര്ശിച്ചിരുന്നു. വിഡ്ഢിത്തണമെന്നാണ് ഇതേക്കുറിച്ച് ഗംഭീര് ചൂണ്ടിക്കാട്ടിയത്.