Click it and Unblock the Notifications
മിസ്ബാഹ് സ്‌കൂപ്പ് ഷോട്ടായിരുന്നു കളിച്ചത്. അത് മുകളിലേക്ക് ഉയര്‍ന്നു പൊങ്ങി. അപ്പോഴാണ് ഷോര്‍ട്ട് ഫൈന്‍ ലെഗ്ഗില്‍ ആരാണ് ഫീല്‍ഡറെന്നു ശ്രദ്ധിച്ചത്. അവിടെയുണ്ടായിരുന്നത് ശ്രീശാന്തായിരുന്നു. അതുവരെ ക്യാച്ചുകള്‍ നഷ്ടപ്പെടുത്തിയതിന്റെ പേരിലായിരുന്നു ശ്രീശാന്ത് അറിയപ്പെട്ടിരുന്നത്. പ്രത്യേകിച്ചും വളരെ സിംപിളായ ക്യാച്ച് പോലും അവന്‍ പാഴാക്കും. സിംപിള്‍ ക്യാച്ചുകള്‍ പോലും ശ്രീശാന്ത് കൈവിടുന്നത് താന്‍ കണ്ടിട്ടുള്ളതായും ഉത്തപ്പ പറഞ്ഞിരുന്നു.
കരിയറില്‍ ഇതുവരെ ഉത്തപ്പ എത്ര ക്യാച്ചുകളെടുത്തെന്ന് തനിക്കറിയില്ല. കഴിഞ്ഞ സീസണില്‍ കേരളത്തിനു വേണ്ടിയാണ് അദ്ദേഹം കളിച്ചത്. വളരെ അനായാസ ക്യാച്ചുകള്‍ പോലും ഉത്തപ്പ നഷ്ടപ്പെുത്തിയതായി അന്നു പരാതികളുണ്ടായിരുന്നു.
അധികം വൈകാതെ തന്നെ കേരള ടീമിനൊപ്പം താന്‍ ചേരുകയും ഉത്തപ്പയോടൊപ്പം കളിക്കുകയും ചെയ്യും. തന്റെ ബൗളിങില്‍ ക്യാച്ച് നഷ്ടപ്പെടുത്തരുതെന്നാണ് ഇപ്പോള്‍ ഉത്തപ്പയോടു പറയാനുള്ളത്. കഴിഞ്ഞ സീസണില്‍ ഒരുമിച്ച കളിച്ച ജൂനിയര്‍ താരങ്ങള്‍ ക്യാച്ച് കൈവിട്ടതിന്റെ പേരില്‍ ഒന്നും നിങ്ങളോട് പറഞ്ഞിട്ടില്ലായിരിക്കാം. എന്നാല്‍ അടുത്ത സീസണില്‍ തന്റെ ബൗളിങിലാണ് ക്യാച്ച് നഷ്ടമാക്കുന്നതെങ്കില്‍ താന്‍ എന്തു ചെയ്യുമെന്ന് നിനക്കറിയാമെന്നും ശ്രീശാന്ത് പറഞ്ഞു.
എട്ടു വര്‍ഷം നീണ്ട അന്താരാഷ്ട്ര കരിയറില്‍ നാലോ, അഞ്ചോ ക്യാച്ചുകള്‍ മാത്രമേ താന്‍ നഷ്ടപ്പെടുത്തിയിട്ടുള്ളൂവെന്ന് ശ്രീശാന്ത് വ്യക്തമാക്കി. പ്രൊഫഷണല്‍ കരിയറില്‍ ഒരുപക്ഷെ 10-15 ക്യാച്ചുകള്‍ മാത്രമേ താന്‍ പാഴാക്കിയിട്ടുള്ളൂ. പരിശീലനത്തിനിടെ ജോണ്ടി റോഡ്‌സ് പോലും ക്യാച്ചുകള്‍ പാഴാക്കാറുണ്ടെന്നും 37 കാരനായ ശ്രീശാന്ത് പറഞ്ഞു.
വിലക്ക് നീങ്ങുന്നതോടെ ഈ വര്‍ഷം സപ്തംബറില്‍ ശ്രീശാന്തിനു ക്രിക്കറ്റിലേക്കു തിരിച്ചെത്താനാവും. അടുത്ത സീസണില്‍ കേരളത്തിനു വേണ്ടി താരത്തിനു കളിക്കാം. അതേസമയം, സൗരാഷ്ട്ര ടീമില്‍ നിന്നും കേരളത്തിലേക്കു ചേക്കേറിയ ഉത്തപ്പ അടുത്ത സീസണിലും ഇവിടെ തന്നെ തുടരാനാണ് സാധ്യത.
