മതിയാക്കാന് സമയമായി
15 വര്ഷത്തിലേറെ നീണ്ട ക്രിക്കറ്റ് കരിയറിന് തീരശീലയിടാന് ധോണിക്കു സമയമായിരിക്കുന്നുവെന്നാണ് അദ്ദേഹത്തിന്റെ കുട്ടിക്കാലത്തെ കോച്ചായിരുന്ന കേശവ് ബാനര്ജി പറയുന്നത്. ഇക്കാര്യം തന്നോട് പറഞ്ഞത് ധോണിയുടെ മാതാപിതാക്കള് തന്നെയാണെന്നും അദ്ദേഹം ഒരു ദേശീയ മാധ്യമത്തോടു വെളിപ്പെടുത്തി.
ഞായറാഴ്ച ധോണിയുടെ വീട്ടില് പോവുകയും മാതാപിതാക്കളുമായി സംസാരിച്ചിരുന്നു. ധോണിക്ക് ക്രിക്കറ്റ് വിടാന് സമയമായെന്നാണ് അവര് പറഞ്ഞത്. അപ്പോള് അതിനായിട്ടില്ലെന്നും ഒരു വര്ഷം കൂടി കളിച്ച് അടുത്ത ടി20 ലോകകപ്പിനു ശേഷം വിരമിക്കുന്നതാണ് ഉചിതമെന്ന് താന് അവരോടു പറഞ്ഞതായും ബാനര്ജി വിശദമാക്കി.
ഒരു വര്ഷം കൂടി കാത്തിരിക്കൂ...
ഈ വലിയ വീട് നോക്കാന് ആരുമില്ലെന്നും ധോണി കളി മതിയാക്കി കുടുംബത്തിനൊപ്പം ചെലഴിക്കാനാണ് തങ്ങള് ഇഷ്ടപ്പെടുന്നതെന്നും അദ്ദേഹത്തിന്റെ മാതാപിതാക്കള് പറഞ്ഞിരുന്നു. ഇത്രയും വര്ഷം നിങ്ങള് വീട് നോക്കിയില്ലേയെന്നും ഒരു വര്ഷം കൂടി കാത്തിരുന്നു കൂടെയെന്നുമാണ് അപ്പോള് താന് അവരോട് ചോദിച്ചതെന്നും ബാനര്ജി വ്യക്തമാക്കി.
ധോണിക്ക് വിശ്രമം നല്കിയേക്കും
ആഗസ്റ്റില് നടക്കാനിരിക്കുന്ന വിന്ഡീസ് പര്യടനത്തിനുള്ള ടീമിനെ വെള്ളിയാഴ്ചയാണ് ബിസിസിഐ പ്രഖ്യാപിക്കുന്നത്. ക്യാപ്റ്റന് വിരാട് കോലിയെക്കൂടാതെ ധോണിക്കും പര്യടനത്തില് വിശ്രമം നല്കിയേക്കുമെന്നാണ് സൂചന.
അടുത്ത വര്ഷം ഓസ്ട്രേലിയയില് ടി20 ലോകകപ്പ് നടക്കാനിരിക്കെ യുവതാരങ്ങള്ക്ക് കൂടുതല് അവസരം നല്കാനുള്ള നീക്കത്തിലാണ് ബിസിസിഐ. അതിനാല് ധോണിയെ ഇനി നേരിട്ടു ടീമിലേക്കു പരിഗണിക്കാനും സാധ്യത കുറവാണ്.