ഏകദിന പരമ്പരയില് ഫിഞ്ച് ബാറ്റിങില് ഫ്ളോപ്പായി മാറിയിരുന്നു. ഇന്ത്യന് പേസ് ജോടികളായ ബുംറ- ഭുവനേശ്വര് കുമാര് എന്നിവരുടെ മാരക ബൗളിങിനു മുന്നില് ഫിഞ്ചിനു അടിതെറ്റുകയായിരുന്നു. ഭുവിയുടെ ഇന്സ്വിങറുകള്ക്കു മുന്നില് അദ്ദേഹത്തിന് പിടിച്ചു നില്ക്കാന് കഴിഞ്ഞിരുന്നില്ല. വീണ്ടും വീണ്ടും ഭുവിക്കു വിക്കറ്റ് സമ്മാനിച്ച് ഫിഞ്ച് ക്രീസ് വിട്ടിരുന്നു.
അന്നത്തെ ഇന്ത്യന് പര്യടനത്തില് ബുംറ തന്നെ പുറത്താക്കുമെന്ന് സ്വപ്നം കണ്ട് പല തവണ ഞെട്ടിയെഴുന്നേറ്റിട്ടുള്ളതായി ഫിഞ്ച് വെളിപ്പെടുത്തി. നാളെ ബുംറയെ നേരിടാനുള്ളതാണ്. അദ്ദേഹം വീണ്ടും തന്നെ പുറത്താക്കും. ഈ സ്വപ്നം കണ്ട് ഉറക്കം നഷ്ടപ്പെട്ടിട്ടുണ്ട്. എന്നാല് മറിച്ചായിരുന്നു സംഭവിച്ചത്. തൊട്ടടുത്ത ദിവസം നടന്ന മല്സരത്തില് ഭുവനേശ്വറിന് താന് വിക്കറ്റ് സമ്മാനിച്ചു. പിന്നീടും ഇതു തന്നെ ആവര്ത്തിച്ചതായി ഫിഞ്ച് കൂട്ടിച്ചേര്ത്തു.
കോച്ച് ജസ്റ്റിന് ലാങറും ടീമംഗങ്ങളുമെല്ലാം ഒരുപോലെ പിന്തുണച്ചിട്ടും ഇന്ത്യന് ബൗളര്മാരുടെ മികച്ച പ്രകടനത്തിനു മുന്നില് തനിക്കു പിടിച്ചുനില്ക്കാനായില്ലെന്നു ഫിഞ്ച് പറയുന്നു.
മികച്ച സ്കോര് നേടുകയെന്ന ലക്ഷ്യത്തോടെയാണ് ഓരോ മല്സരത്തിലും ഇറങ്ങിയത്. ലാങര് ഓരോ തവണയും തന്റെ ആത്മവിശ്വാസം വര്ധിപ്പിക്കാന് ശ്രമിച്ചു കൊണ്ടിരുന്നു. എല്ലാ നെഗറ്റീവ് ചിന്തകളും മാറ്റി വച്ച് പോസിറ്റീവായി കളിക്കാനായിരുന്നു ശ്രമം. പക്ഷെ നിര്ഭാഗ്യവശാല് അതിനു കഴിഞ്ഞില്ലെന്നും ഫിഞ്ച് വിശദമാക്കി.