IPL 2026:'ഗില്ലിനെ പുറത്താക്കിയ ബിസിസിഐക്ക് ഐപിഎല്ലിൽ പണി കിട്ടും!'; പുജാരയുടെ ഞെട്ടിക്കുന്ന പ്രവചനം

ഇന്ത്യൻ ക്രിക്കറ്റിലെ 'പ്രിൻസ്' എന്ന് ആരാധകർ പേരിട്ട് വിളിക്കുന്ന ശുഭ്മാൻ ഗില്ലിനെ ടി20 ഫോർമാറ്റിൽ നിന്ന് ബിസിസിഐ തഴഞ്ഞത് വലിയ ചർച്ചകൾക്ക് വഴിയൊരുക്കിയിരുന്നു. ടെസ്റ്റിലും ഏകദിനത്തിലും ടീമിനെ നയിക്കുന്ന ഗില്ലിനെ ടി20 ലോകകപ്പ് ടീമിൽ നിന്ന് പോലും ഒഴിവാക്കിയത് ആരാധകരെ അമ്പരപ്പിച്ചിരുന്നു. അതിനെതിരെ ​ഗിൽ ആരാധകർ വലിയ പ്രതിഷേധങ്ങൾ നടത്തിയിരുന്നു.

ടി20 ഫോർമാറ്റിൽ താരത്തിന്റെ സ്ട്രൈക്ക് റേറ്റ് വളരെ കുറവായതിനാലാണ് തഴയപ്പെട്ടത് എന്നാണ് പുറത്ത് വരുന്ന വിവരങ്ങൾ. എന്നാൽ ഈ അവഗണന ഗില്ലിനെ കൂടുതൽ കരുത്തനാക്കുമെന്നും ഐപിഎൽ 2026-ൽ താരം തകർപ്പൻ പ്രകടനം പുറത്തെടുക്കുമെന്നും മുൻ ഇന്ത്യൻ താരം ചേതേശ്വർ പുജാര വിശ്വസിക്കുന്നു. ഇനി ​ഗില്ലിന് തന്റെ കഴിവ് തെളിയിക്കാൻ ഏറ്റവും മികച്ച മാർ​ഗം ഐപിഎൽ തന്നെയാണെന്നും അദ്ദേഹം പറഞ്ഞു. 'ജിയോ ഹോട്ട്സ്റ്റാർ' ഷോയിൽ സംസാരിക്കുകയായിരുന്നു അദ്ദേഹം.

"ആ പുറത്താക്കൽ ഗില്ലിനെ ശക്തനാക്കും !"

2025 ഡിസംബറിൽ ദക്ഷിണാഫ്രിക്കയ്‌ക്കെതിരെയാണ് ഗിൽ അവസാനമായി ഇന്ത്യക്ക് വേണ്ടി ടി20 കളിച്ചത്. ഗില്ലില്ലാതെ തന്നെ ഇന്ത്യ 2026 ടി20 ലോകകപ്പ് നേടിയതോടെ താരത്തിന്റെ തിരിച്ചുവരവ് പ്രയാസകരമാകുമെന്ന് പലരും കരുതി. എന്നാൽ പുജാരയുടെ അഭിപ്രായം മറ്റൊന്നാണ്. "ലോകകപ്പ് ടീമിൽ നിന്ന് ഒഴിവാക്കപ്പെട്ടത് ഗില്ലിനെ തീർച്ചയായും പ്രകോപിപ്പിച്ചിട്ടുണ്ടാകും. അവൻ മൂന്ന് ഫോർമാറ്റിലും കളിക്കാൻ കെൽപ്പുള്ള താരമാണ്. ഐപിഎല്ലിൽ മികച്ചൊരു സീസൺ കാഴ്ചവെച്ചാൽ ഇന്ത്യൻ ടി20 ടീമിലേക്ക് അവന് തിരിച്ചു വരാം," പുജാര പറഞ്ഞു.

സ്ട്രൈക്ക് റേറ്റ് ഉയർത്തണം; പുജാരയുടെ ഉപദേശം

ബാറ്റിംഗ് മികവിൽ സംശയമില്ലെങ്കിലും ടി20-യിൽ ഗില്ലിന്റെ സ്ട്രൈക്ക് റേറ്റ് പലപ്പോഴും വിമർശിക്കപ്പെട്ടിട്ടുണ്ട്. സെലക്ടർമാരുടെ ശ്രദ്ധ പിടിച്ചുപറ്റാൻ ഗിൽ തന്റെ ബാറ്റിംഗ് ശൈലിയിൽ മാറ്റം വരുത്തണമെന്ന് പുജാര നിർദ്ദേശിച്ചു. "ഗില്ലിന് മേൽ സമ്മർദ്ദമുണ്ടാകും എന്നത് സത്യമാണ്. പക്ഷേ സ്ട്രൈക്ക് റേറ്റ് 150-നും 160-നും ഇടയിൽ നിലനിർത്തി വലിയ സ്കോറുകൾ നേടാൻ അവന് സാധിച്ചാൽ സെലക്ടർമാർക്ക് അവനെ മാറ്റിനിർത്താൻ കഴിയില്ല. അതിനുള്ള ഏറ്റവും മികച്ച വേദിയാണ് ഈ ഐപിഎൽ," പുജാര വ്യക്തമാക്കി.

ഗുജറാത്ത് ടൈറ്റൻസിനെ നയിക്കുന്ന ഗില്ലിന് ഈ സീസൺ വ്യക്തിപരമായും ടീം എന്ന നിലയിലും അത്യന്താപേക്ഷിതമാണ്. സഞ്ജു സാംസൺ ചെന്നൈയിലേക്ക് മാറിയതും പന്തിന്റെ തിരിച്ചുവരവും ഐപിഎല്ലിൽ വലിയ ഓളങ്ങൾ സൃഷ്ടിക്കുന്നതിനിടെ ഗില്ലിന്റെ ഈ 'അഗ്നിപരീക്ഷ' കാണാൻ കാത്തിരിക്കുകയാണ് ആരാധകർ. മാർച്ച് 28-ന് ആരംഭിക്കുന്ന ഐപിഎൽ 2026-ൽ ഗിൽ തന്റെ സ്ട്രൈക്ക് റേറ്റ് ഉയർത്തി പഴയ പ്രതാപത്തിലേക്ക് തിരിച്ചെത്തുമോ എന്നാണ് ക്രിക്കറ്റ് ലോകം ഉറ്റുനോക്കുന്നത്. നിലവിൽ ഇന്ത്യൻ ടീമിന്റെ ഏകദിന - ടെസ്റ്റ് ടീമുകളെ നയിക്കുന്ന ശുഭ്മാൻ ​ഗില്ലിന് ​ഗുജറാത്തിനെ കിരീടത്തിലേക്ക് എത്തിക്കാൻ സാധിക്കുമോ എന്നതും ചോദ്യചിഹ്നമാണ്.