Click it and Unblock the Notifications
രണ്ടാം ഇന്നിങ്‌സില്‍ 126 റണ്‍സിന് ഓള്‍ഔട്ടായതാണ് ആതിഥേയര്‍ക്ക് നാണക്കേടായത്.ഡോം ബെസ്സും ജാക്ക് ലീച്ചും നാല് വിക്കറ്റ് വീതം പങ്കിട്ടപ്പോള്‍ ശ്രീലങ്കന്‍ ബാറ്റിങ് നിര ചീട്ടുകൊട്ടാരം പോലെ തകര്‍ന്നു. നായകന്‍ ജോ റൂട്ട് രണ്ട് വിക്കറ്റും വീഴ്ത്തി. വാലറ്റത്ത് ലസിത് എംബുല്‍ഡാനിയ (40) നടത്തിയ ചെറുത്തുനില്‍പ്പാണ് വലിയ നാണക്കേടില്‍ നിന്ന് ആതിഥേയരെ രക്ഷിച്ചത്. കുശാല്‍ പെരേര (14),ലഹിരു തിരിമാനെ (13),രമേഷ് മെന്‍ഡിസ്,സുരങ്ക ലക്മാല്‍ (11) എന്നിവരാണ് മറ്റ് പ്രധാന സ്‌കോറര്‍മാര്‍.
ആദ്യ ഇന്നിങ്‌സില്‍ സെഞ്ച്വറി നേടിയ ഏഞ്ചലോ മാത്യൂസ് (5), ക്യാപ്റ്റന്‍ ദിനേഷ് ചണ്ഡിമാല്‍ (9),നിരോഷന്‍ ഡിക്വെല്ല (7) എന്നിവര്‍ക്കൊന്നും രണ്ടാം ഇന്നിങ്‌സില്‍ തിളങ്ങാന്‍ സാധിക്കാതിരുന്നത് ശ്രീലങ്കയ്ക്ക് വലിയ തിരിച്ചടിയായി. സ്വന്തം തട്ടകത്തിലാണ് ഇത്തരത്തില്‍ ശ്രീലങ്കയ്ക്ക് ബാറ്റിങ് തകര്‍ച്ച നേരിട്ടതെന്നതാണ് ദൗര്‍ഭാഗ്യകരം.
ഒന്നാം ഇന്നിങ്‌സില്‍ ലീഡ് നേടിയ ശേഷമാണ് ശ്രീലങ്ക കളി കൈവിട്ടത്. ടോസിന്റെ ആനുകൂല്യത്തില്‍ ആദ്യം ബാറ്റ് ചെയ്ത ശ്രീലങ്ക ഒന്നാം ഇന്നിങ്‌സില്‍ 381 എന്ന മികച്ച സ്‌കോര്‍ സ്വന്തമാക്കി. ഏഞ്ചലോ മാത്യൂസ് (110),ദിനേഷ് ചണ്ഡിമാല്‍ (52),നിരോഷന്‍ ഡിക്വെല്ല (92),ദില്‍റൂവന്‍ പെരേര (67) എന്നിവരുടെ പ്രകടനമാണ് ആദ്യ ഇന്നിങ്‌സില്‍ ശ്രീലങ്കയെ തുണച്ചത്. ഇംഗ്ലണ്ടിനുവേണ്ടി ജെയിംസ് ആന്‍ഡേഴ്‌സന്‍ ആറ് വിക്കറ്റ് വീഴ്ത്തി കരുത്ത് കാട്ടിയപ്പോള്‍ മാര്‍ക്ക് വുഡ് മൂന്ന് വിക്കറ്റും പിഴുത് മികച്ച പിന്തുണ നല്‍കി.
മറുപടിക്കിറങ്ങിയ ഇംഗ്ലണ്ടിന്റെ പോരാട്ടം 344 റണ്‍സില്‍ അവസാനിച്ചു. നായകന്‍ ജോ റൂട്ടിന്റെ (186) സെഞ്ച്വറിയാണ് വന്‍ തകര്‍ച്ചയില്‍ നിന്ന് ഇംഗ്ലണ്ടിനെ രക്ഷിച്ചത്. ഡോം ബെസ് (32),ജോണി ബെയര്‍സ്‌റ്റോ (28) എന്നിവരാണ് മറ്റ് പ്രധാന സ്‌കോറര്‍മാര്‍.ശ്രീലങ്കയ്ക്കുവേണ്ടി എംബുല്‍ഡാനിയ ഏഴ് വിക്കറ്റുകളാണ് വീഴ്ത്തിയത്. 37 റണ്‍സിന്റെ ഒന്നാം ഇന്നിങ്‌സ് ലീഡ് വഴങ്ങിയ ശേഷമാണ് ശ്രീലങ്ക രണ്ടാം ഇന്നിങ്‌സില്‍ തകര്‍ന്നടിഞ്ഞത്. എന്തായാലും ഇന്ത്യന്‍ പരമ്പരയ്‌ക്കൊരുങ്ങുന്ന ഇംഗ്ലണ്ടിന് വലിയ ആത്മവിശ്വാസം നല്‍കുന്ന പരമ്പര നേട്ടമാണിത്.
