ധോണി ക്യാപ്റ്റന്‍സി ഒഴിഞ്ഞത് സ്വമനസാലെയാണോ? ഇതാ ഉത്തരം.. പറയുന്നത് അടുത്ത സുഹൃത്ത്!

അരുണ്‍ പാണ്ഡെ പറയുന്നു

ധോണി ക്യാപ്റ്റന്‍ സ്ഥാനം വിട്ടൊഴിഞ്ഞതിനെച്ചൊല്ലിയുള്ള വിവാദങ്ങള്‍ അടിസ്ഥാന രഹിതമാണ് എന്നാണ് അരുണ്‍ പാണ്ഡെ പറയുന്നത്. ആരാണ് അരുണ്‍ പാണ്ഡെ എന്നല്ലേ. ധോണിയുടെ അടുത്ത സുഹൃത്താണ് പാണ്ഡെ. സുഹൃത്ത് മാത്രമല്ല, പരസ്യകാര്യങ്ങള്‍ ശ്രദ്ധിക്കുന്ന മാനേജരും കൂടിയാണ് അരുണ്‍ പാണ്ഡെ.

പെട്ടെന്നെടുത്ത തീരുമാനമല്ല

ഒരുനിമിഷം കൊണ്ട് എടുക്കാവുന്ന ഒരു തീരുമാനമല്ല ഇത്. ഏറെക്കാലം ചിന്തിച്ചാണ് എം എസ് ധോണി ഈ തീരുമാനം എടുത്തത്. ക്യാപ്റ്റന്‍സി രാജിവെക്കാമെന്നും കളിക്കാരനായി ടീമില്‍ തുടരാം എന്നുമായിരുന്നു ധോണിയുടെ തീരുമാനം. വിക്കറ്റ് കീപ്പര്‍ ബാറ്റ്‌സ്മാനായി ധോണി ടീമിലുണ്ടാകും.

ലോകകപ്പ് മുന്നില്‍ കണ്ട്

ടീമിന്റെ താല്‍പര്യങ്ങള്‍ മുന്നില്‍ കണ്ട് തീരുമാനം എടുക്കുന്ന ആളാണ് എം എസ് എന്നാണ് അരുണ്‍ പാണ്ഡെ പറയുന്നത്. 2019 ലോകകപ്പ് മുന്നില്‍ കണ്ടാണ് ഇപ്പോഴത്തെ രാജി പ്രഖ്യാപനം. ഇതാണ് ക്യാപ്റ്റന്‍സി ഒഴിയാനുള്ള കൃത്യമായ സമയം എന്ന് ധോണി കരുതി. വ്യക്തിതാല്‍പര്യങ്ങള്‍ക്ക് ധോണി വലിയ പ്രാധാന്യം കൊടുക്കാറില്ല.

ഗാംഗുലിയുടെ കമന്റ്

എം എസ് ധോണി ക്യാപ്റ്റന്‍സി വിരാട് കോലിയെ ഏല്‍പ്പിക്കേണ്ട സമയമായി എന്ന് നേരത്തെ സൗരവ് ഗാംഗുലി അഭിപ്രായപ്പെട്ടിരുന്നു. ധോണിയുടെ തീരുമാനത്തെ ഇത് സ്വാധീനിച്ചോ എന്ന ചോദ്യത്തിന് ഇല്ല എന്നായിരുന്നു പാണ്ഡെയുടെ ഉത്തരം. ഇത്തരം കാര്യങ്ങളൊന്നും ധോണിയെ അലട്ടാറില്ല - പാണ്ഡെ പറഞ്ഞു.