ചാമ്പ്യന്‍മാര്‍ക്ക് വിജയത്തുടക്കം, അഫ്ഗാനിസ്ഥാനെ 7 വിക്കറ്റിന് തകര്‍ത്ത് ഓസ്‌ട്രേലിയ

ബ്രിസ്റ്റോള്‍: ലോകകപ്പ് ക്രിക്കറ്റില്‍ ചാമ്പ്യന്‍മാരായ ഓസ്‌ട്രേലിയക്ക് വിജയത്തുടക്കം. ചെറുമീനുകളായ അഫ്ഗാനിസ്ഥാനെ 7 വിക്കറ്റിനാണ് ഓസീസ് തകര്‍ത്തത്. 208 റണ്‍സ് വിജയലക്ഷ്യവുമായി ഇറങ്ങിയ ഓസ്‌ട്രേലിയ 34.5 ഓവറില്‍ വിജയം നേടുകയായിരുന്നു. ഡേവിഡ് വാര്‍ണര്‍, ആരോണ്‍ ഫിഞ്ച് എന്നിവര്‍ അര്‍ധസെഞ്ച്വറികളുമായി ഓസീസിന്റെ വിജയത്തില്‍ നിര്‍ണായക പങ്കുവഹിച്ചു. തിരിച്ചുവരവില്‍ വാര്‍ണറുടെ തകര്‍പ്പന്‍ പ്രകടനം കൂടിയാണ് ബ്രിസ്റ്റോളില്‍ കണ്ടത്.

ടോസ് നേടിയ അഫ്ഗാനിസ്ഥാന്‍ ബാറ്റിംഗ് തിരഞ്ഞെടുക്കുകയായിരുന്നു. ഓസീസിന്റെ പേസ് നിരയ്‌ക്കെതിരെ പതറിയെങ്കിലും മികച്ച ചെറുത്തുനില്‍പ്പാണ് പിന്നീട് ടീം നടത്തിയത്. ഓപ്പണര്‍മാരായ മുഹമ്മദ് ഷഹസാദിനെയും സസായിയെയും അഞ്ച് റണ്‍സിനിടെ നഷ്ടമായ അഫ്ഗാന്‍ 48 റണ്‍സെടുത്ത റഹ്മത്ത് ഷായുടെയും ഷഹീദിയുടെയും മികവിലാണ് തിരിച്ചുവന്നത്. അര്‍ധസെഞ്ച്വറി നേടിയ നജീബുല്ല സദ്രാനാണ് ടോപ് സ്‌കോറര്‍. സദ്രാന്‍ 49 പന്തില്‍ 7 ബൗണ്ടറിയും രണ്ട് സിക്‌സറുമടിച്ചാണ് അര്‍ധസെഞ്ച്വറി നേടിയത്.

ഗുല്‍ബാദിന്‍ നയിബ്, റാഷിദ് ഖാന്‍ എന്നിവരും തിളങ്ങി. 11 പന്തില്‍ 27 റണ്‍സടിച്ച റാഷിദ് ഖാന്‍ മികച്ച ബാറ്റിംഗാണ് കാഴ്ച്ചവെച്ചത്. ഓസീസ് നിരയില്‍ മൂന്ന് വിക്കറ്റ് വീതമെടുത്ത പാറ്റ് കമ്മിന്‍സും ആദം സാമ്പയും തിളങ്ങി. മറുപടി ബാറ്റിംഗില്‍ വാര്‍ണര്‍ 114 പന്തില്‍ പുറത്താകാതെ 89 റണ്‍സടിച്ചു. എട്ട് ബൗണ്ടറിയുണ്ട് വാര്‍ണറുടെ ഇന്നിംഗ്‌സില്‍. ക്യാപ്റ്റന്‍ ആരോണ്‍ ഫിഞ്ച് 49 പന്തില്‍ 66 റണ്‍സെടുത്തു.

ആറ് ഫോറും നാല് സിക്‌സുമാണ് ഫിഞ്ച പറത്തിയത്. ഓപ്പണിംഗില്‍ വാര്‍ണറും ഫിഞ്ചും ചേര്‍ന്ന് 96 റണ്‍സടിച്ചതോടെ ഓസീസ് വിജയം ഉറപ്പിച്ചിരുന്നു. ഉസ്മാന്‍ കവാജ, സ്റ്റീവന്‍ സ്മിത്ത്, എന്നിവരാണ് പുറത്തായ മറ്റ് താരങ്ങള്‍. അഫ്ഗാനിസ്ഥാന് വേണ്ടി മുജീബ്, റാഷിദ് ഖാന്‍, നയീബ് എന്നിവര്‍ ഓരോ വിക്കറ്റെടുത്തു.