Click it and Unblock the Notifications
ഒരു വര്‍ഷത്തെ വിലക്ക്
ദക്ഷിണാഫ്രിക്കയ്‌ക്കെതിരേ മാര്‍ച്ചില്‍ നടന്ന ടെസ്റ്റിനിടെ പന്തില്‍ കൃത്രിമം കാണിക്കാന്‍ ശ്രമിച്ചതായി കണ്ടെത്തിയതിനെ തുടര്‍ന്നാണ് അന്നു ടീമിന്റെ ക്യാപ്റ്റനായിരുന്ന സ്മിത്തിനും വൈസ് ക്യാപ്റ്റനായിരുന്ന വാര്‍ണര്‍ക്കും സിഎ ഒരു വര്‍ഷത്തെ വിലക്കേര്‍പ്പെടുത്തിയത്. പന്തില്‍ കൃത്രിമം കാണിക്കാന്‍ ശ്രമിച്ചതാണ് ബാന്‍ക്രോഫ്റ്റിനെതിരായ കുറ്റം. താരത്തിന് ഒമ്പതു മാസത്തെ വിലക്കാണുള്ളത്. സ്മിതത്തിന്റെയും വാര്‍ണറുടെയും അറിവോടെയാണ് ബാന്‍ക്രോഫ്റ്റ് നിയമവിരുദ്ധ പ്രവര്‍ത്തനം നടത്തിയതെന്ന് ക്രിക്കറ്റ് ഓസ്‌ട്രേലിയ കണ്ടെത്തിയിരുന്നു.
ബാന്‍ക്രോഫ്റ്റിന്റെ വിലക്ക് ഈ വര്‍ഷം ഡിസംബര്‍ 29നും സ്മിത്ത്, വാര്‍ണര്‍ എന്നിവരുടെ വിലക്ക് 2019 മാര്‍ച്ചിലുമാണ് അവസാനിക്കുന്നത്.
ശിക്ഷയനുഭവിച്ചു കഴിഞ്ഞു
കുറ്റം ചെയ്ത സ്മിത്ത്, വാര്‍ണര്‍, ബാന്‍ക്രോഫ്റ്റ് എന്നിവര്‍ ഇതിനകം ശിക്ഷയനുഭവിച്ചു കഴിഞ്ഞതായും അതിനാല്‍ മൂന്നു പേരുടെയും വിലക്ക് നീക്കണമെന്നും ഓസ്‌ട്രേലിയന്‍ ക്രിക്കറ്റേഴ്‌സ് അസോസിയേഷന്‍ സിഎയോട് അഭ്യര്‍ഥിക്കുകയായിരുന്നു. കഴിഞ്ഞ മാസമാണ് ഇതു സംബന്ധിച്ച് അസോസിയേഷന്‍ പ്രസ്താവനയിറക്കിയത്.
ക്രിക്കറ്റ് ഓസ്‌ട്രേലിയുടെ ഭാഗത്തു നിന്നും താരങ്ങള്‍ക്കു നേരെയുണ്ടായ നടപടി ധിക്കാരപരമാണന്നും ഇതു നിയന്ത്രിക്കേണ്ടതുണ്ടെന്നും അസോസിയേഷന്‍ ആവശ്യപ്പെട്ടിരുന്നു. കൂടാതെ സിഎ അതിന്റെ മൂല്യത്തിനൊത്ത് ഉയര്‍ന്നില്ലെന്നും അസോസിയേഷന്‍ ചൂണ്ടിക്കാട്ടിയിരുന്നു.
വിശദമായി പരിശോധിച്ചു
ക്രിക്കറ്റേഴ്‌സ് അസോസിയേഷന്റെ നിരീക്ഷണങ്ങളും ആവശ്യങ്ങളുമെല്ലാം സിഎ വിശദമായി പരിശോധിക്കുകയും ചര്‍ച്ച നടത്തുകയും ചെയ്തതായി സിഎ ഇടക്കാല ചെയര്‍മാന്‍ ഏള്‍ എഡ്ഡിങ്‌സ് പ്രസ്താവനയിലൂടെ അറിയിച്ചു. മൂന്നു കളിക്കാര്‍ക്കുമെതിരേ സ്വീകരിച്ച ശിക്ഷാനടപടി ഉചിതമാണെന്നും അത് മാറ്റുന്നത് ശരിയല്ലെന്നുമുള്ള തീരുമാനത്തിലാണ് ബോര്‍ഡ് എത്തിച്ചേര്‍ന്നത്. നേരത്തേ വളരെയധികം ചര്‍ച്ചകള്‍ക്കും വാദപ്രതിവാദങ്ങള്‍ക്കും ശേഷമാണ് മൂന്നു കളിക്കാരെയും വിലക്കാനുള്ള തീരുമാനമെടുത്തതെന്നും അദ്ദേഹം വിശദമാക്കി.
അനാവശ്യ സമ്മര്‍ദ്ദം
പന്ത് ചുരണ്ടല്‍ സംഭവത്തില്‍ തങ്ങള്‍ തെറ്റുകാരാണെന്നും അതു കൊണ്ടു തന്നെ സിഎയുടെ ശിക്ഷ അംഗീകരിക്കുന്നതായും മൂന്നു താരങ്ങളും നേരത്തേ അറിയിച്ചതാണ്. ഇപ്പോള്‍ വിലക്ക് വെട്ടിച്ചുരുക്കണമെന്ന തരത്തില്‍ ചര്‍ച്ചകള്‍ നടന്നത് മൂന്നു താരങ്ങള്‍ക്കും മേല്‍ അനാവശ്യ സമ്മര്‍ദ്ദമുണ്ടാക്കാന്‍ മാത്രമേ ഉപകരിക്കുകയുള്ളൂ. അതുകൊണ്ടു തന്നെ വിലക്കിനെതിരേ ഭേദഗതി വരുത്തണമെന്ന തരത്തില്‍ ഇനിയുള്ള ഒരു ആവശ്യവും പരിഗണിക്കില്ലെന്നും എഡ്ഡിങ്‌സ് അറിയിച്ചു.
