ടീം ഇന്ത്യ കരുതിക്കോ!! കഥ കഴിക്കാന്‍ ഓസീസ് അവരെ തിരിച്ചുവിളിക്കും? ഇനി കളി മാറും...

വിലക്ക് പിന്‍വലിക്കാന്‍ സമ്മര്‍ദ്ദം

ഓസ്‌ട്രേലിയന്‍ ക്രിക്കറ്റേഴ്‌സ് അസോസിയേഷനാണ് (എസിഎ) താരങ്ങളുടെ വിലക്ക് നീക്കണമെന്ന് ക്രിക്കറ്റ് ഓസ്‌ട്രേലിയയോട് ആവശ്യപ്പെട്ടിരിക്കുന്നത്. എത്രയും വേഗം മൂന്നു പേരെയും ദേശീയ ടീമിലേക്കു തിരിച്ചുവിളിക്കണമെന്നും അസോസിയേഷന്‍ അഭ്യര്‍ഥിച്ചിട്ടുണ്ട്. അനുകൂലമായ നിലപാട് തന്നെ ക്രിക്കറ്റ് ഓസ്‌ട്രേലിയയുടെ ഭാഗത്തു നിന്നുണ്ടാവുമെന്നാണ് സൂചനകള്‍.

സൂചന നല്‍കി സിഇഎ

മൂന്നു താരങ്ങളുടെയും വിലക്ക് ഉടന്‍ നീക്കുന്നതിനെക്കുറിച്ച് ആലോചിക്കുന്നുണ്ടെന്ന് ക്രിക്കറ്റ് ഓസ്‌ട്രേലിയ സിഇഒ കെവിന്‍ റോബേര്‍ട്ട്‌സ് പറഞ്ഞു. വിലക്ക് ഉടന്‍ നീക്കുകയാണെങ്കില്‍ ഇന്ത്യക്കെതിരേ വരാനിരിക്കുന്ന പരമ്പരയില്‍ സ്മിത്തും വാര്‍ണറും ബാന്‍ക്രോഫ്റ്റുമെല്ലാം കളിച്ചേക്കും.
താരങ്ങളുടെ വിലക്ക് നീക്കുന്നതു സംബന്ധിച്ച് എസിഎയുടെ അപേക്ഷ സിഎയ്ക്കു കുറച്ചു ദിവസങ്ങള്‍ക്കു മുമ്പ് ലഭിച്ചിരുന്നു. ഇതേക്കുറിച്ച് ബോര്‍ഡ് വിശദമായി ചര്‍ച്ച ചെയ്യുമെന്നും റോബേര്‍ട്ട്‌സ് വിശദമാക്കി.

ആഭ്യന്തര ക്രിക്കറ്റില്‍ കളിക്കുന്നു

സ്മിത്തിനെയും വാര്‍ണറെയും ഒരു വര്‍ഷത്തേക്കും ബാന്‍ക്രോഫ്റ്റിനെ ഒമ്പതു മാസത്തേക്കുമാണ് ക്രിക്കറ്റ് ഓസ്‌ട്രേലിയ വിലക്കിയിരിക്കുന്നത്. അന്താരാഷ്ട്ര മല്‍സരങ്ങളിലും രാജ്യത്തെ മുന്‍നിര ആഭ്യന്തര ടൂര്‍ണമെന്റുകളിലുമാണ് വിലക്കുള്ളത്. എങ്കിലും സ്മിത്തും വാര്‍ണറും സിഡ്‌നിയില്‍ നടന്ന പ്രാദേശിക ലീഗ് മല്‍സരങ്ങളിലും കാനഡയില്‍ നടന്ന ഗ്ലോബല്‍ ടി20 ടൂര്‍ണമെന്റ്, കരീബിയന്‍ പ്രീമിയര്‍ ലീഗ് എന്നിവയിലും വിവിധ ഫ്രാഞ്ചൈസികള്‍ക്കായി കളിച്ചിരുന്നു.