സച്ചിന്റെ നേട്ടത്തിനരികെ
ടൂര്ണമെന്റില് റണ്വേട്ടക്കാരുടെ ലിസ്റ്റില് രണ്ടാംസ്ഥാനത്ത് ഷാക്വിബുണ്ട്. ഏഴ് ഇന്നിങ്സുകളില് നിന്നും 542 റണ്സാണ് താരം നേടിയത്. രണ്ടു സെഞ്ച്വറികളും നാലു ഫിഫ്റ്റികളുമടക്കമാണ് താരം ഇത്രയും റണ്സ് അടിച്ചെടുത്തത്.
പാകിസ്താനെതിരേ ഇന്നു 50ല് കൂടുതല് റണ്സെടുക്കാനായാല് ഷാക്വിബ് പുതിയൊരു റെക്കോര്ഡിനൊപ്പമെത്തും. ലോകകപ്പിന്റെ ഒരു എഡിഷനില് ഏഴു തവണ 50ല് കൂടുതല് റണ്സെടുത്ത ഇന്ത്യയുടെ ഇതിഹാസ ബാറ്റ്സ്മാന് സച്ചിന് ടെണ്ടുല്ക്കറുടെ റെക്കോര്ഡാണ് ഷാക്വിബിനെ കാത്തിരിക്കുന്നത്. 2003ലെ ലോകകപ്പിലായിരുന്നു സച്ചിന് റണ് മഴ പെയ്യിച്ചത്. അന്ന് 11 ഇന്നിങ്സുകളില് നിന്നും ഒരു സെഞ്ച്വറിയും ആറു ഫിഫ്റ്റിയുമടക്കം 673 റണ്സായിരുന്നു അദ്ദേഹത്തിന്റെ സമ്പാദ്യം.
11 തവണ 50ല് കൂടുതല് റണ്സ്
കരിയറില് ഇതുവരെ കളിച്ച ലോകകപ്പ് മല്സരങ്ങള് പരിഗണിച്ചാല് ഷാക്വിബ് 11 തവണയാണ് 50ല് കൂടുതല് റണ്സ് നേടിയിട്ടുള്ളത്. എലൈറ്റ് ലിസ്റ്റില് മൂന്നാംസ്ഥാനത്ത് അദ്ദേഹമുണ്ട്. ഒന്നു കൂടി നേടിയാല് ശ്രീലങ്കയുടെ മുന് ഇതിഹാസ താരം കുമാര് സങ്കക്കാരയ്ക്കൊപ്പം ഷാക്വിബുമെത്തും.
35 ഇന്നിങ്സുകളില് നിന്നും 12 തവണയാണ് സങ്കക്കാര 50ന് മുകളില് നേടിയിട്ടുള്ളത്. ലോകകപ്പില് അഞ്ചു സെഞ്ച്വറികളും ഏഴു ഫിഫ്റ്റികളുമടക്കം 1532 റണ്സും അദ്ദേഹത്തിന്റെ പേരില്
സച്ചിന് ബഹുദൂരം മുന്നില്
എലൈറ്റ് ലിസ്റ്റില് മറ്റൊരു താരത്തിനും എത്തിപ്പിടിക്കാനാവാത്ത വിധം ഉയരത്തിലാണ് അദ്ദേഹം. 44 ഇന്നിങ്സുകളില് 21 തവണയാണ് അദ്ദേഹം 50ല് കൂടുതല് റണ്സെടുത്തത്.
ഇതില് ആറു സെഞ്ച്വറികളും 15 ഫിഫ്റ്റികളുമുള്പ്പെടുന്നു. 2278 റണ്സാണ് ലോകകപ്പില് നിന്നു മാത്രം മാസ്റ്റര് ബ്ലാസ്റ്റര് അടിച്ചെടുത്തിട്ടുള്ളത്.