ആരാവും ലോകകപ്പിന്റെ താരം? ഇനിയാരും സ്വപ്‌നം കാണേണ്ട... ഉറപ്പിച്ചു, ബംഗ്ലാദേശ് തുറുപ്പുചീട്ട്

ജയസൂര്യയുടെ റെക്കോര്‍ഡിനൊപ്പം

ഈ ലോകകപ്പില്‍ പല റെക്കോര്‍ഡുകള്‍ക്കൊപ്പവും ഷാക്വിബ് എത്തിയിരുന്നു. ഇതില്‍ ഏറ്റവും പ്രധാനപ്പെട്ട ഒഒന്നായിരുന്നു ലങ്കയുടെ മുന്‍ ഇതിഹാസം സനത് ജയസൂര്യയുടെ റെക്കോര്‍ഡിനൊപ്പമെത്തിയത്. ജയസൂര്യക്കു ശേഷം ലോകകപ്പില്‍ 1000 റണ്‍സും 30 വിക്കറ്റുകളും തികച്ച താരമായി ഷാക്വിബ് മാറിയിരുന്നു.
27 മല്‍സരങ്ങളില്‍ നിന്നും ബംഗ്ലാദേശ് താരം ഇതിനകം 1016 റണ്‍സും 33 വിക്കറ്റുകളും നേടിക്കഴിഞ്ഞു. 38 കളികളില്‍ നിന്നും 1165 റണ്‍സും 25 വിക്കറ്റുകളുമാണ് ജയസൂര്യയുടെ സമ്പാദ്യം. 1996ലെ ലോകകപ്പിലെ പ്ലെയര്‍ ഓഫ് ദി സീരീസ് പുരസ്‌കാരവും അദ്ദേഹത്തിനായിരുന്നു. 2011ല്‍ ഇ്ന്ത്യയുടെ സൂപ്പര്‍ താരം യുവരാജ് സിങിനു ശേഷം പ്ലെയര്‍ ഓഫ് ദി ടൂര്‍ണമെന്റാവുന്ന ആദ്യ ഏഷ്യന്‍ താരമെന്ന നേട്ടമാണ് ഷാക്വിബിനെ കാത്തിരിക്കുന്നത്.

മൂന്നാം നമ്പറില്‍ കസറി

ബാറ്റിങില്‍ ഷാക്വിബിനെ നിര്‍ണായകമായ മൂന്നാം നമ്പറിലേക്ക് പ്രൊമോട്ട് ചെയ്യാനുള്ള ബംഗ്ലാദേശിന്റെ തന്ത്രമാണ് ലോകകപ്പില്‍ വന്‍ വിജയമായി മാറിയത്. ഈ പൊസിഷനില്‍ ഷാക്വിബ് ശരിക്കും കസറുകയാണ്. മൂന്നാമനായി ഇറങ്ങാന്‍ തനിക്കു താല്‍പ്പര്യമുണ്ടെന്ന് അദ്ദേഹം തന്നെയാണ് ടീം മാനേജ്‌മെന്റിനെ അറിയിച്ചത്. ഇതിന് പച്ചക്കൊടി ലഭിക്കുകയും ചെയ്തു.
നേരത്തേ ടീമിനായി അഞ്ചാമനായാണ് ഷാക്വിബ് ബംഗ്ലാദേശിനായി ഇറങ്ങിയിരുന്നത്. അപ്പോള്‍ 35 ആയിരുന്നു അദ്ദേഹത്തിന്റെ ബാറ്റിങ് ശരാശരി. 125 മല്‍സരങ്ങളില്‍ നിന്നും 3852 റണ്‍സും ഷാക്വിബ് നേടിയിട്ടുണ്ട്. എന്നാല്‍ മൂന്നാനായ ശേഷം വെറും 21 മല്‍സരങ്ങളില്‍ നിന്നും 1047 റണ്‍സ് ഷാക്വിബ് അടിച്ചെടുത്തു കഴിഞ്ഞു. 58ന് മുകളില്‍ ശരാശരിയിലാണ് അദ്ദേഹം ഇത്രയും റണ്‍സ് നേടിയത്.

റണ്‍വേട്ടയില്‍ മുന്നില്‍

നിലവില്‍ ലോകകപ്പിലെ റണ്‍വേട്ടക്കാരില്‍ അമരത്ത് ഷാക്വിബാണ്. ആറ് ഇന്നിങ്‌സുകളിലായി 476 റണ്‍സ് താരം നേടിയിട്ടുണ്ട്. 95.20 ശരാശരിയിലാണ് ഷാക്വിബ് ഇത്രയും റണ്‍സെടുത്തത്.
ബൗളിങിലും ബംഗ്ലാദേശ് താരം മോശമാക്കിയില്ല. വിക്കറ്റ് വേട്ടക്കാരില്‍ ആദ്യ പത്തില്‍ ഷാക്വിബുമുണ്ട്. ആറ് ഇന്നിങ്‌സുകളില്‍ നിന്നും 10 വിക്കറ്റുകളാണ് താരം നേടിയത്. ഇതില്‍ ഒരു അഞ്ച് വിക്കറ്റ് നേട്ടവുമുള്‍പ്പെടുന്നു. അഫ്ഗാനിസ്താനെതിരായ കഴിഞ്ഞ കളിയിലാണ് ഷാക്വിബ് ഫിഫ്റ്റിയും അഞ്ചു വിക്കറ്റും കൊയ്ത് ടീമിന്റെ ജയത്തിന് ചുക്കാന്‍ പിടിച്ചത്.