IPL 2026: റുതുരാജ് ടീമിനോട് ചെയ്യുന്നത് അനീതി! സഞ്ജുവിനൊപ്പം ഓപ്പണറാവേണ്ടത് ആ കുട്ടി താരം, വിമർശിച്ച് ചോപ്ര

ചെന്നൈ സൂപ്പർ കിംഗ്‌സ് വിജയവഴിയിൽ തിരിച്ചെത്തിയെങ്കിലും നായകൻ റുതുരാജ് ഗെയ്‌ക്‌വാദിന്റെ ബാറ്റിംഗ് ഇൻ്റന്റ് (Intent) ഇപ്പോൾ വലിയ ചർച്ചകൾക്ക് വഴിവെച്ചിരിക്കുകയാണ്. മുൻ ഇന്ത്യൻ താരം ആകാശ് ചോപ്രയാണ് രുതുരാജിനെതിരെ കടുത്ത വിമർശനവുമായി രംഗത്തെത്തിയത്. ആധുനിക ടി20 ക്രിക്കറ്റിലെ മറ്റ് ഓപ്പണർമാരുമായി താരതമ്യം ചെയ്യുമ്പോൾ റുതുരാജ് ബഹുദൂരം പിന്നിലാണെന്ന് ചോപ്ര തുറന്നടിച്ചു.

ആകാശ് ചോപ്രയുടെ വാക്കുകൾ:

തന്റെ യൂട്യൂബ് ചാനലിലൂടെ ചോപ്ര പറഞ്ഞത് ഇങ്ങനെ:

"ആധുനിക ടി20 ഓപ്പണർമാരും റുതുരാജും തമ്മിൽ യാതൊരു താരതമ്യവുമില്ല. ലോകത്തെ മറ്റ് ഓപ്പണർമാർ 178 സ്ട്രൈക്ക് റേറ്റിലും 50-ന് മുകളിൽ ശരാശരിയിലും ബാറ്റ് വീശുമ്പോഴാണ് റുതുരാജ് ഈ ഐപിഎല്ലിൽ വെറും 103 സ്ട്രൈക്ക് റേറ്റിൽ ബാറ്റ് ചെയ്യുന്നത്. 18 പന്തുകൾ നേരിട്ട് വെറും 15 റൺസ് മാത്രം നേടുന്നത് അല്ലെങ്കിൽ മൂന്ന് ഓവറിൽ 15 റൺസ് മാത്രം സ്കോർ ചെയ്യുന്നത് ടീമിനോട് ചെയ്യുന്ന അനീതിയാണ്."

യുവതാരം ആയുഷ് മാത്രെ ഗംഭീര ഫോമിലാണെന്നും അതിനാൽ രുതുരാജിന് പകരം ആയുഷിനെ സഞ്ജു സാംസണിനൊപ്പം ഓപ്പണിംഗിന് അയക്കണമെന്നും ചോപ്ര നിർദ്ദേശിച്ചു.

രുതുരാജ് vs ആധുനിക ടി20 ശൈലി

ഡൽഹിക്കെതിരായ മത്സരത്തിൽ സഞ്ജു സാംസൺ (115*) കത്തിക്കയറിയപ്പോഴും റുതുരാജ് തുടക്കത്തിൽ താളം കണ്ടെത്താൻ ബുദ്ധിമുട്ടിയിരുന്നു. പവർപ്ലേ ഓവറുകളിൽ കൂടുതൽ റൺസ് കണ്ടെത്തേണ്ടത് ടി20യിൽ അനിവാര്യമായിരിക്കെ, നായകൻ തന്നെ മെല്ലെപ്പോക്ക് നടത്തുന്നത് ടീമിന്റെ ടോട്ടലിനെ ബാധിക്കുന്നുണ്ടെന്നാണ് ചോപ്രയുടെ വിലയിരുത്തൽ. സഞ്ജുവിന്റെ ആക്രമണശൈലിക്കൊപ്പം ചേരാൻ ആയുഷ് മാത്രെയെപ്പോലെയുള്ള ഒരു യുവതാരമാണ് കൂടുതൽ അനുയോജ്യമെന്നും അദ്ദേഹം കൂട്ടിച്ചേർത്തു.

ഐപിഎൽ 2026-ൽ തുടർച്ചയായ പരാജയങ്ങൾക്ക് ശേഷം ചെന്നൈ സൂപ്പർ കിംഗ്‌സ് തങ്ങളുടെ ആദ്യ വിജയം ആഘോഷിക്കുകയാണ്. എം.എ. ചിദംബരം സ്റ്റേഡിയത്തിൽ നടന്ന മത്സരത്തിൽ ഡൽഹി ക്യാപിറ്റൽസിനെയാണ് സിഎസ്കെ തകർത്തത്. പരിക്കിൽ നിന്ന് മുക്തനായി ഡെവാൾഡ് ബ്രെവിസ് ടീമിൽ തിരിച്ചെത്തിയെങ്കിലും താരത്തിന് ബാറ്റ് ചെയ്യേണ്ട ആവശ്യമേ വന്നില്ല. സഞ്ജു സാംസൺ ഒറ്റയ്ക്ക് ബാറ്റിംഗ് നിയന്ത്രിച്ചപ്പോൾ ഡൽഹി ബൗളർമാർ നിഷ്പ്രഭരായി.

ക്രീസിൽ സഞ്ജു പൂരം: 115 റൺസ്!*

വിമർശകർക്ക് സഞ്ജു സാംസൺ നൽകിയ മറുപടിയായിരുന്നു ചേപ്പോക്കിലെ ആ ഇന്നിംഗ്‌സ്. വെറും 58 പന്തിൽ നിന്ന് പുറത്താകാതെ 115 റൺസാണ് സഞ്ജു അടിച്ചുകൂട്ടിയത്. 12 ഫോറുകളും 7 സിക്സറുകളും അടങ്ങിയ ആ ഇന്നിംഗ്‌സ് സ്റ്റേഡിയത്തെ മഞ്ഞക്കടലാക്കി മാറ്റി. സഞ്ജുവിന്റെ ഈ മിന്നും പ്രകടനം കാരണം മധ്യനിരയിൽ ബ്രെവിസിനെ ബാറ്റിംഗിനായി ഇറക്കേണ്ടി വന്നില്ല എന്നത് ചെന്നൈയുടെ ബാറ്റിംഗ് ആധിപത്യം വ്യക്തമാക്കുന്നു. അടുത്ത മത്സരത്തിൽ കൊൽക്കത്തയ്ക്കെതിരെ എം.എസ്. ധോണി കൂടി തിരിച്ചുവരികയാണെങ്കിൽ, ചെന്നൈ നിര ഇതിലും ശക്തമാകും എന്ന് ഉറപ്പാണ്.