വൈഭവിനെ ഇന്ത്യൻ ടീമിലെടുക്കാൻ വരട്ടെ; സഞ്ജുവും അഭിഷേകും ഉണ്ടല്ലോ? കാരണം പറഞ്ഞ് ആകാശ് ചോപ്ര

ഐപിഎൽ 2026 എലിമിനേറ്ററിൽ രാജസ്ഥാൻ റോയൽസ് സൺറൈസേഴ്‌സ് ഹൈദരാബാദിനെ തോൽപ്പിച്ചപ്പോൾ, വൈഭവ് സൂര്യവംശിയായിരുന്നു കളിയിലെ താരമായി തിരഞ്ഞെടുക്കപ്പെട്ടത്. മുല്ലൻപൂരിലെ മഹാരാജ യാദവീന്ദ്ര സിംഗ് സ്‌റ്റേഡിയത്തിൽ നടന്ന ഈ മത്സരത്തിൽ 29 പന്തിൽ നിന്ന് 97 റൺസ് അടിച്ചുകൂട്ടി വൈഭവ് ഐപിഎൽ ചരിത്രത്തിലെ മികച്ച പ്രകടനങ്ങളിലൊന്ന് കാഴ്‌ചവച്ചതോടെ കൈയ്യടി നേടുകയാണ്.

പ്ലെയർ ഓഫ് ദ മാച്ച് പുരസ്‌കാരവും അതിനൊപ്പം ഓറഞ്ച് ക്യാപ്പും നേടിയ ഈ 15 വയസുകാരനെ ഇന്ത്യൻ ടി20 ടീമിലേക്ക് പരിഗണിക്കണമെന്ന ശക്തമായ ആവശ്യം ഇതിനെത്തുടർന്ന് ഉയർന്നിരുന്നു. എന്നാൽ, മുൻ ഇന്ത്യൻ ഓപ്പണർ ആകാശ് ചോപ്രയ്ക്ക് ഈ വിഷയത്തിൽ വ്യത്യസ്‌തമായ അഭിപ്രായമാണ്. വൈഭവിന് ഒരു ഭാഗത്ത് നിന്ന് വലിയൊരു പിന്തുണ വരുമ്പോഴാണ് വ്യത്യസ്‌തമായ അഭിപ്രായവുമായി ആകാശ് ചോപ്ര രംഗത്ത് വരുന്നത്.

മത്സരത്തിന് ശേഷമാണ് ആകാശ് ചോപ്ര തന്റെ നിലപാട് വ്യക്തമാക്കിയത്. അടുത്ത ടി20 ലോകകപ്പിന് ഇനിയും രണ്ട് വർഷമുണ്ടെന്നും, ഈ സമയം പുതിയ കോമ്പിനേഷനുകൾ പരീക്ഷിക്കാൻ ഇന്ത്യക്ക് ധാരാളമുണ്ടെന്നും അദ്ദേഹം ചൂണ്ടിക്കാട്ടി. മികച്ച പ്രകടനം നടത്തിയതുകൊണ്ട് മാത്രം സൂര്യവംശിയെ ടീമിലെടുത്താൽ, നിലവിൽ മികച്ച ഫോമിലുള്ള അഭിഷേക് ശർമ്മയെയും സഞ്ജു സാംസണിനെയും പോലുള്ള ഓപ്പണർമാരെ ഒഴിവാക്കേണ്ടി വരുമെന്നും ചോപ്ര പറഞ്ഞു.

'അടുത്ത ലോകകപ്പിന് ഇനിയും രണ്ട് വർഷമുണ്ട്. സമയമുണ്ട്. തീർച്ചയായും ഇത് ആവേശം നൽകുന്ന കാര്യമാണ്. ഐപിഎൽ ഇന്ത്യയിലെ ഏറ്റവും മികച്ച ടി20 ടൂർണമെന്റാണ്. അതിനാൽ, റെക്കോർഡുകൾ തകർത്ത് മികച്ച പ്രകടനം നടത്തുകയാണെങ്കിൽ, അത് ഗൗരവമായി എടുക്കുക തന്നെ വേണം. ഈ കുട്ടി അസാധാരണ കഴിവുള്ളവനാണ്, അതിൽ സംശയമില്ല' ആകാശ് ചോപ്ര ചൂണ്ടിക്കാട്ടി.

എന്നാൽ, മറ്റൊരാൾ നന്നായി കളിച്ചതുകൊണ്ട് മാത്രം ടീമിൽ യാതൊരു കാരണവശാലും മാറ്റങ്ങൾ വരുത്തരുതെന്നും അദ്ദേഹം കൂട്ടിച്ചേർത്തു. അബദ്ധത്തിൽ മാറ്റങ്ങൾ വരുത്തുന്നതിൽ അർത്ഥമില്ലെന്നും നിലവിലെ ടീം ഘടനയെയും കളിക്കാരുടെയും പ്രകടനത്തെയും പരിഗണിക്കണമെന്നും ചോപ്ര വ്യക്തമാക്കി. ടീമിന്റെ സംയോജനത്തിന് ഊന്നൽ നൽകേണ്ടതുണ്ടെന്നും അദ്ദേഹം പറയുന്നു.

ഒരു കളിക്കാരന് ടീമിൽ നിന്ന് പുറത്തുപോകണമെങ്കിൽ അയാൾക്ക് പരാജയപ്പെടേണ്ടതുണ്ടെന്ന് ചോപ്ര വിശദീകരിച്ചു. 'ഒരാൾ ടോപ്പ് റാങ്കിൽ നിൽക്കുമ്പോൾ, മറ്റൊരാൾക്ക് കൂടുതൽ മാർക്ക് ലഭിക്കുമെന്ന് കരുതി ടോപ്പറെ എങ്ങനെ മാറ്റാൻ കഴിയും? അയാൾ ടോപ്പർ തന്നെയാണ്' ചോപ്ര ഊന്നിപ്പറഞ്ഞു. നിലവിലുള്ള മികച്ച കളിക്കാരന്റെ സ്ഥാനം അനാവശ്യമായി ചോദ്യം ചെയ്യരുതെന്നും അദ്ദേഹം കൂട്ടിച്ചേർത്തു.

'നിങ്ങൾ അഭിഷേക് ശർമ്മയെയും സഞ്ജു സാംസണെയും കുറിച്ചാണ് സംസാരിക്കുന്നത്. സ്ഥിരതയാർന്ന പ്രകടനം നടത്തുന്ന ഇവരെ പോലുള്ള കളിക്കാരെ ഇപ്പോൾ മാറ്റേണ്ടതില്ല. അത്തരമൊരു മാറ്റം വരുത്തിയാൽ, രണ്ടോ മൂന്നോ വർഷത്തിനുള്ളിൽ വൈഭവ് സൂര്യവംശിക്ക് ഒരു മോശം അവസ്ഥ വന്നാൽ, ഇതേ തത്വം തന്നെയായിരിക്കും പിന്തുടരുകയെന്ന് എനിക്ക് എഴുതിത്തരാൻ കഴിയും' ചോപ്ര മുന്നറിയിപ്പ് നൽകി.

വൈഭവ് സൂര്യവംശി ഇപ്പോഴും കരിയറിന്റെ തുടക്കത്തിൽ നിൽക്കുന്ന യുവതാരമായതുകൊണ്ട് ഇന്ത്യൻ ടീമിലേക്ക് തിരഞ്ഞെടുക്കുന്നതിന് സെലക്ഷൻ കമ്മിറ്റിക്ക് ധാരാളം സമയമുണ്ടെന്ന് ആകാശ് ചോപ്ര വിശദീകരിച്ചു. അജിത് അഗാർക്കർ, ആർപി സിംഗ്, പ്രഗ്യാൻ ഓജ എന്നിവരടങ്ങുന്ന കമ്മിറ്റിക്ക് സമ്മർദ്ദം നേരിടേണ്ടി വരുമെങ്കിലും, ഇന്ത്യൻ ക്രിക്കറ്റിന് ശരിയായത് അവർ ചെയ്യുമെന്നാണ് വിശ്വാസമെന്നും അദ്ദേഹം കൂട്ടിച്ചേർത്തു.