ആ പഞ്ചാബ് താരത്തെ ലോകകപ്പിൽ ഉൾപ്പെടുത്താതിരുന്നത് ഞെട്ടിക്കുന്നത്, ഐപിഎല്ലിൽ തിളങ്ങുമെന്ന് ആകാശ് ചോപ്ര

ഐപിഎൽ 2026-ന് മുന്നോടിയായി പഞ്ചാബ് കിംഗ്‌സിന്റെ (PBKS) കരുത്തിനെ വാനോളം പുകഴ്ത്തി മുൻ താരം ആകാശ് ചോപ്ര. ടീമിലെ വിക്കറ്റ് ടേക്കർമാരായ അർഷ്ദീപ് സിംഗും യുസ്‌വേന്ദ്ര ചഹാലുമാണ് പഞ്ചാബിന്റെ തുറുപ്പുചീട്ടുകളെന്ന് അദ്ദേഹം നിരീക്ഷിച്ചു. തന്റെ യൂട്യൂബ് ചാനലിലൂടെയാണ് ചോപ്ര പഞ്ചാബ് കിംഗ്‌സിന്റെ പ്ലസ് പോയിന്റുകൾ എണ്ണിപ്പറഞ്ഞത്. യുസി ചഹാൽ മറ്റേതെങ്കിലും രാജ്യത്തായിരുന്നെങ്കിൽ അദ്ദേഹം ആ രാജ്യത്തിന്റെ 2026 ടി20 ലോകകപ്പ് ടീമിൽ തീർച്ചയായും ഇടം പിടിക്കുമായിരുന്നു എന്നും അദ്ദേഹം കൂട്ടിച്ചേർത്തു.

18 കോടി രൂപ വീതം നൽകി നിലനിർത്തിയ അർഷ്ദീപും ചഹാലും പഞ്ചാബിന്റെ ബൗളിംഗ് നിരയ്ക്ക് വലിയ മൂർച്ചയാണ് നൽകുന്നത്. "യുസി ചഹാലിന്റെ കളി ഒരിക്കലും മോശമാകുന്നില്ല. അദ്ദേഹം തന്റെ സ്പിൻ വലയിൽ ബാറ്റിംഗ് നിരയെ കുരുക്കും. തുടർച്ചയായി രണ്ട് ലോകകപ്പ് കിരീടങ്ങൾ നേടിയ അർഷ്ദീപ് സിംഗും അദ്ദേഹത്തിനൊപ്പമുണ്ട്. എട്ട് ഓവറോളം വിക്കറ്റ് വീഴ്ത്താൻ ശേഷിയുള്ള ബൗളർമാർ കൈവശമുള്ളപ്പോൾ മത്സരത്തിന്റെ ഗതി നിയന്ത്രിക്കാൻ നിങ്ങൾക്ക് എളുപ്പമാകും," ചോപ്ര തന്റെ യൂട്യൂബ് ചാനലിൽ പറഞ്ഞു.

ഓൾറൗണ്ടർമാരുടെ വൻനിര

പഞ്ചാബ് കിംഗ്‌സിൽ ഓൾറൗണ്ടർമാരുടെ ഒരു നിര തന്നെയുണ്ടെന്ന് ചോപ്ര നിരീക്ഷിച്ചു. അസ്മത്തുള്ള ഒമർസായ്, കൂപ്പർ കോണലി, മാർക്കോ ജാൻസൺ, മുഷീർ ഖാൻ, മിച്ചൽ ഓവൻ, മാർക്കസ് സ്റ്റോയിനിസ്, സൂര്യൻഷ് ഷെഡ്‌ഗെ എന്നിവർ ഇതിൽ ഉൾപ്പെടുന്നു. ഹർപ്രീത് ബ്രാർ മികച്ച രീതിയിൽ ബാറ്റ് ചെയ്യുന്നതും ടീമിന് ഗുണകരമാണ്. ജോഷ് ഇംഗ്ലിസിന് പകരക്കാരനായാണ് കൂപ്പർ കോണലി ടീമിലെത്തിയത്.

ഭയമില്ലാത്ത ടീം

"ഈ ടീം അഞ്ച് വിരലുകൾ ചേർത്ത് പിടിച്ച ഒരു മുഷ്ടി പോലെയാണ്," പഞ്ചാബ് കിംഗ്‌സ് ഒരു യൂണിറ്റായി ഒത്തിണക്കത്തോടെ കളിക്കുന്നതിനെ ചോപ്ര പ്രശംസിച്ചു. പ്രിയാൻഷ് ആര്യ, പ്രഭ്സിമ്രാൻ സിംഗ് എന്നിവർ ടീമിന് പുതുജീവൻ നൽകുന്നു. നെഹാൽ വധേരയെയും ശശാങ്ക് സിംഗിനെയും പോലുള്ള അൺക്യാപ്പ്ഡ് താരങ്ങളെ ശാക്തീകരിച്ചതാണ് ടീമിന്റെ വിജയത്തിന് പിന്നിലെ രഹസ്യമെന്നും അദ്ദേഹം പറഞ്ഞു.

ഭയമില്ലാതെയും ആശങ്കകളില്ലാതെയും ക്രിക്കറ്റ് കളിക്കുന്നതാണ് പഞ്ചാബിന്റെ ഫിലോസഫി. മാർക്കോ ജാൻസൺ വരെ നീളുന്ന ബാറ്റിംഗ് നിര ടീമിന് വലിയ ഡെപ്ത് നൽകുന്നു. കൂടാതെ, ശ്രേയസ് അയ്യരുടെ നായകത്വവും ടീമിന് വലിയ പോസിറ്റീവ് ആണെന്ന് ചോപ്ര വിലയിരുത്തി. അയ്യർ മൈതാനത്ത് എടുക്കുന്ന തീരുമാനങ്ങളെല്ലാം കൃത്യമാണെന്ന് മുൻ പേസർ സഹീർ ഖാൻ തന്നോട് പറഞ്ഞതായും അദ്ദേഹം വെളിപ്പെടുത്തി. കഴിഞ്ഞ വർഷം കൊൽക്കത്ത നൈറ്റ് റൈഡേഴ്സിൽ നിന്ന് പഞ്ചാബിലേക്ക് ചേക്കേറിയ ശ്രേയസ് അയ്യർ പഞ്ചാബ് കിങ്സിനെ ഫൈനൽ വരെ എത്തിച്ചു. കെകെആറിന് കിരീടം നേടിക്കൊടുത്ത നായകൻ കൂടിയാണ് ശ്രേയസ് അയ്യർ. അയ്യരുടെ മികച്ച ഫോമും ക്യാപ്റ്റൻസി മികവും തീർച്ചയായും പഞ്ചാബിന് ​ഗുണം ചെയ്യും.