IPL 2026: ബാറ്റിംഗിൽ പുലി, ബൗളിംഗിൽ വെറും എലി! ഹൈദരാബാദിന്റെ പണി ഇത്തവ പാളുമെന്ന് മുൻ ഇന്ത്യൻ താരം

2026 ഐപിഎൽ സീസണ് കൊടിയേറാൻ ദിവസങ്ങൾ മാത്രം ബാക്കിനിൽക്കെ, മുൻ ചാമ്പ്യന്മാരായ സൺറൈസേഴ്‌സ് ഹൈദരാബാദിന് (SRH) കനത്ത മുന്നറിയിപ്പുമായി മുൻ ഇന്ത്യൻ താരം അഭിനവ് മുകുന്ദും ദക്ഷിണാഫ്രിക്കൻ ഇതിഹാസം ഫാഫ് ഡു പ്ലെസിസും. ഹൈദരാബാദിന്റെ ബാറ്റിംഗ് നിര അതിശക്തമാണെങ്കിലും ബൗളിംഗ് നിര അങ്ങേയറ്റം പരിതാപകരമാണെന്നാണ് ഇരുവരും ഒരേസ്വരത്തിൽ പറയുന്നത്. "അവരുടെ ബാറ്റിംഗിന് ഞാൻ 10 മാർക്ക് നൽകിയാൽ ബൗളിംഗിന് വെറും 1 മാർക്ക് മാത്രമേ നൽകൂ," എന്ന് മുകുന്ദ് പരിഹസിച്ചു. ഇഎസ്പിഎൻ ക്രിക് ഇൻഫോയിൽ (ESPN Cricinfo) സംസാരിക്കുകയായിരുന്നു അദ്ദേഹം.

"ബൗളിംഗ് നിരയിൽ പരീക്ഷണങ്ങൾ മാത്രം!"; മുകുന്ദിന്റെ രൂക്ഷവിമർശനം

കൈയ്യിൽ വൻ തുകയുണ്ടായിട്ടും ലേലത്തിൽ ഹൈദരാബാദ് കാണിച്ച വലിയ മണ്ടത്തരത്തെ മുകുന്ദ് ചോദ്യം ചെയ്തു. "നിങ്ങളുടെ പക്കൽ നേരത്തെ തന്നെ ട്രാവിസ് ഹെഡ്, അഭിഷേക് ശർമ്മ, ഹെൻറിച്ച് ക്ലാസൻ എന്നിവരുണ്ട്. എന്നിട്ടും എന്തിനാണ് വീണ്ടും ഒരു വിദേശ ഓൾറൗണ്ടറായ ലിയാം ലിവിംഗ്സ്റ്റണെ 13 കോടിക്ക് വാങ്ങിയത്? ആ പണം നല്ലൊരു പേസ് ബൗളറെ വാങ്ങാൻ ഉപയോഗിക്കാമായിരുന്നു," മുകുന്ദ് പറഞ്ഞു.

ഹൈദരാബാദിന്റെ ബൗളിംഗ് നിരയിൽ ഐപിഎൽ പരിചയമില്ലാത്തവരാണ് അധികവും. ഫസ്റ്റ് ക്ലാസ് ക്രിക്കറ്റിൽ പോലും സ്ഥിരതയില്ലാത്ത പലരെയും ട്രയൽസ് നോക്കി മാത്രം ടീമിലെടുത്തത് ടീമിന് തിരിച്ചടിയാകും. ഭുവനേശ്വർ കുമാർ, നടരാജൻ എന്നിവരുടെ അഭാവം നികത്താൻ ഹർഷൽ പട്ടേലിനും ജയദേവ് ഉനദ്കട്ടിനും കഴിയില്ലെന്നും അദ്ദേഹം കൂട്ടിച്ചേർത്തു.

"ഒരേ കുട്ടയിൽ എല്ലാ മുട്ടയും വെക്കരുത്!"; മുന്നറിയിപ്പുമായി ഡു പ്ലെസിസ്

ബാറ്റിംഗിൽ മാത്രം ശ്രദ്ധ കേന്ദ്രീകരിച്ച് എതിരാളികളെ തോൽപ്പിക്കാം എന്ന ഹൈദരാബാദിന്റെ 2024-ലെ 'ടെംപ്ലേറ്റ്' ഇത്തവണ വിജയിക്കില്ലെന്ന് ഫാഫ് ഡു പ്ലെസിസ് ഓർമ്മിപ്പിച്ചു. "കഴിഞ്ഞ സീസണിൽ പിച്ചുകൾ ഫ്ലാറ്റ് അല്ലാതിരുന്നപ്പോൾ ഹൈദരാബാദ് ബാറ്റിംഗ് നിര പതറുന്നത് നമ്മൾ കണ്ടതാണ്. ഇപ്പോഴത്തെ സാഹചര്യം നോക്കിയാൽ അഭിഷേക് ശർമ്മയും ക്ലാസനും അത്ര മികച്ച ഫോമിലല്ല. ലിയാം ലിവിംഗ്സ്റ്റൺ ആകട്ടെ ഇംഗ്ലണ്ട് ടീമിൽ പോലും ഇപ്പോഴില്ല. ഒരു വിഭാഗത്തെ മാത്രം വിശ്വസിച്ച് എല്ലാ മുട്ടകളും ഒരേ കുട്ടയിൽ വെക്കുന്ന തന്ത്രം അപകടകരമാണ്," ഡു പ്ലെസിസ് വ്യക്തമാക്കി.

കമ്മിൻസില്ല; ഇനി ഇഷാൻ കിഷൻ നയിക്കും!

പരിക്കേറ്റ സ്ഥിരം നായകൻ പാറ്റ് കമ്മിൻസിന്റെ അഭാവമാണ് ഹൈദരാബാദിനെ അലട്ടുന്ന മറ്റൊരു പ്രധാന പ്രശ്നം. കമ്മിൻസിന് പകരം ഇഷാൻ കിഷനാകും ടൂർണമെന്റിന്റെ ആദ്യ ഘട്ടത്തിൽ ടീമിനെ നയിക്കുക. ബാറ്റിംഗിൽ വെടിക്കെട്ട് താരങ്ങൾ ഉണ്ടെങ്കിലും അനുഭവസമ്പത്തില്ലാത്ത ബൗളിംഗ് നിരയെ ഇഷാൻ കിഷൻ എങ്ങനെ കൈകാര്യം ചെയ്യുമെന്നാണ് ക്രിക്കറ്റ് ലോകം ഉറ്റുനോക്കുന്നത്. മാർച്ച് 28-ന് ബെംഗളൂരുവിൽ നിലവിലെ ചാമ്പ്യന്മാരായ ആർസിബിക്കെതിരെയാണ് ഹൈദരാബാദിന്റെ ആദ്യ പോരാട്ടം.