ഏകദിനത്തില്‍ 60 ബോളില്‍ താഴെ കൂടുതല്‍ സെഞ്ച്വറി; ആദ്യ അഞ്ചില്‍ ഇന്ത്യക്കാരില്ല, ടോപ് ഫൈവ് ഇതാ

എബി ഡിവില്ലിയേഴ്‌സ്

ഏകദിനത്തിലെ വേഗമേറിയ സെഞ്ച്വറിക്ക് ഉടമയായ മുന്‍ ദക്ഷിണാഫ്രിക്കന്‍ താരം എബി ഡിവില്ലിയേഴ്‌സാണ് ഈ പട്ടികയില്‍ തലപ്പത്ത്. 31 ബോളില്‍ സെഞ്ച്വറി നേടിയ എബിഡി നാല് തവണ 60 പന്തില്‍ താഴെ ഏകദിനത്തില്‍ സെഞ്ച്വറി നേടിയിട്ടുണ്ട്. ടോപ് ഓഡറിലും മധ്യനിരയിലും ഒരുപോലെ ബാറ്റ് ചെയ്യാന്‍ മിടുക്കനായ എബിഡി മൈതാനത്തിന്റെ ഏത് ഭാഗത്തേക്കും ഷോട്ട് കളിക്കാന്‍ മികവുള്ള താരമാണ്. 228 ഏകദിനം കളിച്ചിട്ടുള്ള എബിഡി 9577 റണ്‍സ് നേടിയിട്ടുണ്ട്. 25 സെഞ്ച്വറിയും 53 അര്‍ധ സെഞ്ച്വറിയും നേടിയിട്ടുള്ള എബിഡിയുടെ ഉയര്‍ന്ന സ്‌കോര്‍ 176 റണ്‍സാണ്.

ജോസ് ബട്‌ലര്‍

ഇംഗ്ലണ്ടിന്റെ വെടിക്കെട്ട് വിക്കറ്റ് കീപ്പര്‍ ബാറ്റ്‌സ്മാന്‍ ജോസ് ബട്‌ലറാണ് ഈ റെക്കോഡില്‍ രണ്ടാം സ്ഥാനത്ത്. മൂന്ന് തവണ അദ്ദേഹം 60 പന്തില്‍ താഴെ ഏകദിന സെഞ്ച്വറി നേടിയിട്ടുണ്ട്. 2015ല്‍ 46 പന്തില്‍ സെഞ്ച്വറി നേടിയതാണ് ബട്‌ലറുടെ വേഗമേറിയ ഏകദിന സെഞ്ച്വറി. ടോപ് ഓഡറിലും മധ്യനിരയിലും ബാറ്റിങ് മികവ് തെളിയിച്ചിട്ടുള്ള താരമാണ് അദ്ദേഹം. നിലവിലെ ഇംഗ്ലണ്ട് ടീമിന്റെ ഉപനായകനായ ബട്‌ലര്‍ 147 ഏകദിനത്തില്‍ നിന്ന് 3857 റണ്‍സാണ് നേടിയിട്ടുള്ളത്. 9 സെഞ്ച്വറിയും 20 അര്‍ധ സെഞ്ച്വറിയും ബട്‌ലറിന്റെ പേരിലുണ്ട്. 150 റണ്‍സാണ് മികച്ച വ്യക്തിഗത പ്രകടനം.

ഷാഹിദ് അഫ്രീദി

മുന്‍ പാകിസ്താന്‍ ക്യാപ്റ്റന്‍ ഷാഹിദ് അഫ്രീദിയും മൂന്ന് തവണ 60 പന്തില്‍ താഴെ ഏകദിന സെഞ്ച്വറി നേടിയിട്ടുണ്ട്. വെടിക്കെട്ട് ബാറ്റിങ്ങുകൊണ്ട് ആരാധകരുടെ ഇഷ്ടതാരമായി മാറിയ അഫ്രീദിയുടെ വേഗമേറിയ സെഞ്ച്വറി 37 പന്തിലാണ്. 45 പന്തിലും അദ്ദേഹം സെഞ്ച്വറി നേടിയിട്ടുണ്ട്. 398 ഏകദിനത്തില്‍ നിന്ന് 8064 റണ്‍സാണ് അഫ്രീദി നേടിയത്. 6 സെഞ്ച്വറിയും 39 അര്‍ധ സെഞ്ച്വറിയും നേടിയിട്ടുള്ള അദ്ദേഹത്തിന്റെ മികച്ച വ്യക്തിഗത പ്രകടനം 124 റണ്‍സാണ്.

ജോണി ബെയര്‍സ്‌റ്റോ-സനത് ജയസൂര്യ

ഇംഗ്ലണ്ടിന്റെ ജോണി ബെയര്‍സ്‌റ്റോയും മുന്‍ ശ്രീലങ്കന്‍ ഓപ്പണര്‍ സനത് ജയസൂര്യയും രണ്ട് തവണ വീതം 60 പന്തില്‍ താഴെ ഏകദിന സെഞ്ച്വറി നേടിയിട്ടുണ്ട്. 31കാരനായ ബെയര്‍‌സ്റ്റോ 85 ഏകദിനത്തില്‍ നിന്ന് 3245 റണ്‍സാണ് നേടിയിട്ടുള്ളത്. ഇതില്‍ 11 സെഞ്ച്വറിയും 14 അര്‍ധ സെഞ്ച്വറിയും ഉള്‍പ്പെടും. 141 റണ്‍സാണ് ഉയര്‍ന്ന വ്യക്തിഗത പ്രകടനം.

ജയസൂര്യയുടെ വേഗമേറിയ ഏകദിന സെഞ്ച്വറി 48 പന്തിലാണ്. 445 ഏകദിനത്തില്‍ നിന്ന് 13430 റണ്‍സ് അദ്ദേഹത്തിന്റെ പേരിലുണ്ട്. ഇതില്‍ 28 സെഞ്ച്വറിയും 68 അര്‍ധ സെഞ്ച്വറിയും ഉള്‍പ്പെടും. 189 റണ്‍സാണ് ഉയര്‍ന്ന വ്യക്തിഗത പ്രകടനം.