ഇത് വിശ്രമമല്ല, പുറത്താക്കൽ തന്നെയാണ്; സഞ്ജുവിനെ വെട്ടിയ ഗംഭീറിന്റെ തന്ത്രങ്ങളെ ചോദ്യം ചെയ്ത് ചോപ്ര!

ഫോമില്ലായ്മയുടെ പേരിൽ സഞ്ജു സാംസണെ സിംബാബ്‌വെ പര്യടനത്തിനുള്ള ഇന്ത്യൻ ടി20 ടീമിൽ നിന്ന് ഒഴുവാക്കിയതിനെതിരെ രൂക്ഷവിമർശനവുമായി മുൻ ഇന്ത്യൻ ഓപ്പണറും പ്രമുഖ ക്രിക്കറ്റ് നിരീക്ഷകനുമായ ആകാശ് ചോപ്ര. തൊട്ടുമുമ്പ് നടന്ന ടി20 ലോകകപ്പിൽ (2026) ഇന്ത്യയെ കിരീടത്തിലേക്ക് നയിക്കുന്നതിൽ നിർണായക പങ്കുവഹിച്ച, ടൂർണമെന്റിലെ മികച്ച കളിക്കാരനായി തിരഞ്ഞെടുക്കപ്പെട്ട ഒരു താരത്തോട് കാണിച്ചത് തികഞ്ഞ ക്രൂരതയാണെന്ന് അദ്ദേഹം തന്റെ യൂട്യൂബ് ചാനലിലൂടെ തുറന്നടിച്ചു.

"ഒരു കളിക്കാരൻ ഇനി എന്താണ് ചെയ്യേണ്ടത്?"

സഞ്ജുവിനെ മാറ്റിയ നടപടി തികച്ചും ആശങ്കാജനകവും സങ്കടകരവുമാണെന്ന് ആകാശ് ചോപ്ര പറഞ്ഞു. ഒരു കളിക്കാരന് ഇതിലും മികച്ച രീതിയിൽ ടീമിൽ സ്ഥാനം ഉറപ്പിക്കാൻ കഴിയില്ലെന്ന് അദ്ദേഹം ചൂണ്ടിക്കാണിച്ചു:

ആകാശ് ചോപ്ര പറഞ്ഞത്: "ഇത് തികച്ചും ആശങ്കാജനകമായ കാര്യമാണ്. സഞ്ജുവിനോട് സഹതാപം തോന്നുന്നുണ്ട്. അവൻ തൊട്ടുമുമ്പ് ഒരു ലോകകപ്പ് ജയിക്കാൻ ഇന്ത്യയെ സഹായിച്ചു. വെർച്വൽ ക്വാർട്ടർ ഫൈനൽ, സെമി ഫൈനൽ, ഫൈനൽ എന്നിങ്ങനെ തുടർച്ചയായ മൂന്ന് നിർണായക മത്സരങ്ങളിൽ റൺസ് വാരിക്കൂട്ടി ടൂർണമെന്റിലെ മികച്ച കളിക്കാരനായി. ഇതിനപ്പുറം ഒരു കളിക്കാരൻ ഇനി എന്താണ് ചെയ്യേണ്ടത്? അവന്റെ ഐപിഎല്ലും മികച്ചതായിരുന്നു. എന്നിട്ടും കേവലം മൂന്ന് മോശം ഇന്നിങ്സുകളുടെ പേരിൽ ടീമിലെ സ്ഥാനം നഷ്ടപ്പെടുക എന്നത് കഠിനമാണ്. സഞ്ജുവിന് ഇപ്പോൾ നിരാശയോ ദേഷ്യമോ തോന്നുന്നുണ്ടെങ്കിൽ, അതിന് അവന് പൂർണ്ണമായ അവകാശമുണ്ട്. അവനോട് ഇവിടെ അനീതിയാണ് കാണിച്ചിരിക്കുന്നത്."

"ഇത് വിശ്രമമല്ല, പുറത്താക്കൽ തന്നെയാണ്"

ടീമിലേക്ക് ശക്തമായി തിരിച്ചുവന്ന വാഷിംഗ്ടൺ സുന്ദറിനെ മാറ്റുക അസാധ്യമായിരുന്നിരിക്കാം, എന്നാൽ ടീം മാനേജ്മെന്റ് മികച്ചൊരു തന്ത്രമായിരുന്നു സ്വീകരിക്കേണ്ടിയിരുന്നതെന്ന് ചോപ്ര അഭിപ്രായപ്പെട്ടു. കളിക്കാരെ പരസ്പരം റൊട്ടേറ്റ് ചെയ്ത് അവസരങ്ങൾ തുല്യമായി വീതിച്ചു നൽകാൻ ഗൗതം ഗംഭീറിനും മാനേജ്മെന്റിനും സാധിക്കുമായിരുന്നു.

"അഭിഷേക് ശർമ്മയും ഇഷാൻ കിഷനും തുടർച്ചയായി കളിക്കുകയും സഞ്ജു മാത്രം പുറത്തിരിക്കുകയും ചെയ്യുമ്പോൾ അത് ആർക്കും അത്ര സുഖമുള്ള കാര്യമായിരിക്കില്ല. ഇപ്പോൾ കാണുമ്പോൾ സഞ്ജുവിന് 'വിശ്രമം' അനുവദിച്ചതാണെന്ന് തോന്നുന്നില്ല, അവനെ ടീമിൽ നിന്ന് 'പുറത്താക്കിയത്' പോലെ തന്നെയാണ് അനുഭവപ്പെടുന്നത്," ചോപ്ര വ്യക്തമാക്കി.

വിദേശത്തെ മോശം റെക്കോർഡ്

സഞ്ജുവിനെ പിന്തുണയ്ക്കുമ്പോഴും താരത്തിന്റെ വിദേശത്തെ ബാറ്റിംഗ് പ്രകടനങ്ങളിലെ പോരായ്മകളും ചോപ്ര ചൂണ്ടിക്കാണിക്കാൻ മറന്നില്ല. "ഒരു കാര്യം സത്യമാണ്, ഇന്ത്യയ്ക്ക് പുറത്തുള്ള സഞ്ജുവിന്റെ ബാറ്റിംഗ് കണക്കുകൾ അത്ര മികച്ചതല്ല. ഒന്നുകിൽ അവൻ സെഞ്ച്വറി അടിക്കും, അല്ലെങ്കിൽ പൂജ്യത്തിനോ ചെറിയ റൺസിനോ പുറത്താകും. ആ ഒരു സ്ഥിരതയില്ലായ്മ സഞ്ജുവിന് ഇപ്പോഴും തിരിച്ചടിയാണ്," ചോപ്ര തന്റെ വിശകലനം അവസാനിപ്പിച്ചു. ഇന്ന് നടക്കാനിരിക്കുന്ന ഇം​ഗ്ലണ്ടിനെതിരായ മൂന്നാം ടി20 മത്സരത്തിൽ ഇഷാൻ കിഷന് പകരം സഞ്ജു ഇലവനിൽ ഉണ്ടാകും എന്നാണ് പുറത്തുവരുന്ന വാർത്തകൾ.