ഹാർദിക് ഇല്ലെങ്കിൽ പിന്നെ ആര് മുംബൈയെ നയിക്കും? രോഹിതും സൂര്യയുമല്ല,സർപ്രൈസ് താരത്തെ ചൂണ്ടിക്കാട്ടി ആകാശ്

ഐപിഎല്ലിൽ മുംബൈ ഇന്ത്യൻസിന്റെ ക്യാപ്റ്റൻസി തർക്കങ്ങളെക്കുറിച്ചും ഭാവി നായകനെക്കുറിച്ചും വലിയൊരു പ്രവചനവുമായി മുൻ ഇന്ത്യൻ താരം ആകാശ് ചോപ്ര രംഗത്ത്. അടുത്ത സീസണിൽ ഹാർദിക് പാണ്ഡ്യ മുംബൈ ഇന്ത്യൻസിനെ നയിക്കാൻ സാധ്യതയില്ലെങ്കിൽ പകരം ആര് വരുമെന്ന ചോദ്യത്തിനാണ് ക്രെക്സ് ലൈവിലെ ചർച്ചയ്ക്കിടെ ചോപ്ര മറുപടി നൽകിയത്. രോഹിത് ശർമ്മയോ സൂര്യകുമാർ യാദവോ അല്ല മുംബൈയുടെ അടുത്ത നായകനാകേണ്ടതെന്ന് ചോപ്ര വ്യക്തമാക്കുന്നു.

രോഹിതും സൂര്യയും ഹ്രസ്വകാല പരിഹാരങ്ങൾ മാത്രം

മുംബൈ ഇന്ത്യൻസിന് മുന്നിലുള്ള പ്രധാന ഓപ്ഷനുകളെക്കുറിച്ച് ചോപ്ര പറയുന്നത് ഇങ്ങനെയാണ്: "വളരെ രസകരമായ ഒരു കാര്യമാണിത്. അടുത്ത വർഷം ഹാർദിക് പാണ്ഡ്യ ടീമിനെ നയിക്കുന്നില്ലെങ്കിൽ മുംബൈ ഇന്ത്യൻസിന്റെ ക്യാപ്റ്റൻസി ആര് ഏറ്റെടുക്കും? നമ്മുടെ മുന്നിൽ രണ്ടോ മൂന്നോ വ്യക്തമായ ഓപ്ഷനുകളുണ്ട്. അതിലൊന്ന് നിങ്ങൾക്ക് വീണ്ടും രോഹിത് ശർമ്മയിലേക്ക് തന്നെ തിരിച്ചുപോകാം എന്നതാണ്. പക്ഷേ അതൊരു ദീർഘകാലത്തേക്കുള്ള തീരുമാനമായിരിക്കുമോ? ഒരിക്കലുമല്ല. അത് ഒരു താൽക്കാലിക പരിഹാരം മാത്രമാണ്. സൂര്യകുമാർ യാദവിന്റെ കാര്യവും അങ്ങനെ തന്നെയാണ്. അടുത്ത 4-5 വർഷത്തേക്ക് ടീമിനെ നയിക്കാൻ പറ്റിയ ഒരാളെയാണ് മുംബൈക്ക് ആവശ്യം."

യഥാർത്ഥ പോരാട്ടം ബുംറയും തിലക് വർമ്മയും തമ്മിൽ

ഭാവി നായകസ്ഥാനത്തേക്ക് രണ്ടുപേരുടെ പേരുകളാണ് ആകാശ് ചോപ്ര പ്രധാനമായും മുന്നോട്ട് വെക്കുന്നത്. "രോഹിതും സൂര്യയും മാറിയാൽ പിന്നെ നമ്മുടെ മുന്നിൽ രണ്ട് പേരുകൾ മാത്രമാണ് ബാക്കിയുള്ളത്; ജസ്പ്രീത് ബുംറയും തിലക് വർമ്മയും. നിങ്ങൾക്ക് തീർച്ചയായും ജസ്പ്രീത് ബുംറയിലേക്ക് പോകാം, അതിൽ യാതൊരു സംശയവുമില്ല. ഒരു ബൗളർ-ക്യാപ്റ്റൻ എന്ന നിലയിൽ ബുംറ വളരെ മിടുക്കനാണ്. പാറ്റ് കമ്മിൻസ് നായകനായി അത്ഭുതങ്ങൾ കാണിക്കുന്നത് നമ്മൾ കണ്ടതാണ്. പക്ഷേ കമ്മിൻസിനെപ്പോലെ പരിക്കുകൾ കാരണം ബുംറയ്ക്കും മത്സരങ്ങൾ നഷ്ടപ്പെടാറുണ്ട്. പ്രധാന ക്യാപ്റ്റൻ ഇല്ലാതാകുമ്പോൾ അത് ടീമിനെ ബാധിക്കും."

മുംബൈയുടെ അടുത്ത സർപ്രൈസ് നായകൻ തിലക് വർമ്മ?

മുംബൈ ഇന്ത്യൻസിന്റെ ചിന്താഗതി വെച്ച് യുവതാരം തിലക് വർമ്മ ക്യാപ്റ്റനായേക്കുമെന്നാണ് ചോപ്രയുടെ വിലയിരുത്തൽ. "ഞാൻ ഇവിടെ ഒരു പ്രവചനം നടത്തുകയാണ്, മുംബൈ ഇന്ത്യൻസ് ഒരുപക്ഷേ തിലക് വർമ്മയെ തങ്ങളുടെ അടുത്ത നായകനായി നോക്കിക്കണ്ടേക്കാം. മുംബൈയുടെ ഒരു പ്രത്യേകത, അവർ ഒരിക്കലും ഹ്രസ്വകാലത്തേക്ക് ചിന്തിക്കാറില്ല എന്നതാണ്. അവർ രോഹിത്തിനെ ക്യാപ്റ്റനാക്കിയപ്പോഴും ഹാർദിക്കിനെ കൊണ്ടുവന്നപ്പോഴും ഭാവിയെക്കുറിച്ചാണ് ചിന്തിച്ചത്. അതുകൊണ്ട് തന്നെ മുംബൈയുടെ ആ ഭാവി താരം തിലക് വർമ്മ ആയിരിക്കുമെന്നാണ് ഞാൻ കരുതുന്നത്." ചോപ്ര കൂട്ടിച്ചേർത്തു. വരും സീസണുകളിൽ മുംബൈയിൽ വലിയ മാറ്റങ്ങൾ ഉണ്ടാകുമെന്നാണ് ചോപ്രയുടെ വാക്കുകൾ സൂചിപ്പിക്കുന്നത്. ഏതായാലും ഈ സീസണിലെ മോശം പ്രകടനത്തിൽ നിന്ന് കരകയറാൻ ഉള്ള മാർ​ഗങ്ങൾ അടുത്ത സീസണിൽ നോക്കുമെന്ന് ഉറപ്പാണ്.