സെയ്‌ന നെഹ്‌വാള്‍ കൊറിയന്‍ ഓപണ്‍ ക്വാര്‍ട്ടറില്‍

ദില്ലി: ഇന്ത്യന്‍ ബാഡ്മിന്റണ്‍ താരം സെയ്‌ന നെഹ്‌വാള്‍ കൊറിയന്‍ ഓപണ്‍ സൂപ്പര്‍ സീരിസ് ക്വാര്‍ട്ടര്‍ ഫൈനലില്‍ പ്രവേശിച്ചു. രണ്ടാം റൗണ്ടില്‍ ചൈനീസ് തായ്‌പേയില്‍ നിന്നുള്ള ഷാവോ ചീ ചെങിനെയാണ് സെയ്‌ന കീഴടക്കിയത്.

36 മിനിറ്റ് നീണ്ട മല്‍സരം 21-14, 21-10 എന്ന സ്‌കോറിലാണ് അവസാനിച്ചത്. നാലാം സീഡായ സെയ്‌ന അടുത്ത മല്‍സരത്തില്‍ ചൈനയുടെ യാഞ്ചിലാവോ ജിയാങ്- തായ്‌ലാന്‍ഡിലെ ഇന്തനോം റാച്‌നോക് പോരാട്ടത്തിലെ വിജയിയെ നേരിടും.

കോമണ്‍വെല്‍ത്ത് സ്വര്‍ണമെഡല്‍ ജേതാക്കളായ ജ്വാല ഗുട്ട- അശ്വിനി പൊന്നപ്പ സഖ്യം ചൈനയില്‍ നിന്നുള്ള ടോപ് സീഡ് സിയോലി വാങ്-യാങ് യു കൂട്ടുകെട്ടിനു മുന്നില്‍ മുട്ടുമടക്കി. സ്‌കോര്‍: 10-21, 17-21.