സിംഗപ്പൂര്: സിംഗപ്പൂര് ഓപ്പണ് ബാഡ്മിന്റണ് ചാമ്പ്യന്ഷിപ്പില് ഇന്ത്യയുടെ പിവി സിന്ധുവും സൈന നേവാളും ക്വാര്ട്ടറിലെത്തി. ടൂര്ണമെന്റില് നാലാം സീഡായ സിന്ധു ഡെന്മാര്ക്കിന്റെ മിയ ബ്ലിഷ്ഫെല്ട്ടിനെ നേരിട്ടുള്ള സെറ്റുകള്ക്കാണ് കീഴ്പ്പെടുത്തിയത്. സ്കോര് 21-13, 21-19. എതിരാളിക്കെതിരെ മികച്ച കളി കെട്ടഴിച്ച സിന്ധു 39 മിനിറ്റിനുള്ളില് മത്സരം സ്വന്തമാക്കി.
ലോക ആറാം നമ്പര് താരം ചൈനയുടെ സായ് യന്യനാണ് ക്വാര്ട്ടറില് സിന്ധുവിന്റെ എതിരാളി. ആദ്യ സെറ്റില് 8-8 എന്ന നിലയില് എതിരാളിക്കെതിരെ സിന്ധു തുല്യത കാട്ടിയെങ്കിലും പിന്നീട് 11-15 എന്ന നിലയില് ലീഡെടുത്ത താരം സെറ്റ് സ്വന്തമാക്കുകയായിരുന്നു. രണ്ടാം സെറ്റില് 17-17 എന്ന നിലയില് എതിരാളി കടുത്ത പോരാട്ടം നടത്തിയെങ്കിലും സിന്ധുവിന്റെ പരിചയസമ്പന്നത തുണയായി.
തായ്ലന്ഡ് താരം പോണ്പാവീ ചോചുവോങ്ങിനെയാണ് സൈന പരാജയപ്പെടുത്തിയത്. സ്കോര് 21-16, 18-21, 2-19. മൂന്നുസെറ്റിലും ഇരു താരങ്ങളും ഒപ്പത്തിനൊപ്പമുള്ള പ്രകടനമാണ് കാഴ്ചവെച്ചത്. നിര്ണായകമായ മൂന്നാം സെറ്റില് തുടക്കം മുതല് ലീഡെടുത്ത സൈന എതിരാളിയെ ഒപ്പമെത്താന് അനുവദിച്ചില്ല. അവസാന പോയന്റുകളില് പിഴവുകാട്ടാതെയാണ് സൈന സെറ്റ് സ്വന്തമാക്കിയത്.
മറ്റൊരു മത്സരത്തില് ഒളിമ്പിക്സ് ചാമ്പ്യന് ചെന് ലോങ്ങിനെതിരെ ഇന്ത്യയുടെ പി കശ്യപ് പൊരുതിത്തോറ്റു. സ്കോര് 9-21, 21-15, 16-21. ആദ്യ സെറ്റ് ചൈനീസ് താരം അനായാസം സ്വന്തമാക്കിയെങ്കിലും രണ്ടാമത്തെ സെറ്റില് ശക്തമായി തിരിച്ചടിച്ച കശ്യപ് ഒപ്പമെത്തി. മൂന്നാമത്തെ സെറ്റിലും തുടക്കം മുതല് എതിരാളിയെ വിറപ്പിക്കാന് ഇന്ത്യന് താരത്തിന് കഴിഞ്ഞു.