ഓസ്‌ട്രേലിയന്‍ ഓപ്പണില്‍ സൈന ഫൈനലില്‍

സിഡ്‌നി: ഓസ്‌ട്രേലിയന്‍ ഓപ്പണ്‍ ബാഡ്മിന്റണ്‍ ചാമ്പ്യന്‍ഷിപ്പില്‍ ഇന്ത്യന്‍ താരം സൈന നെഹ് വാള്‍ ഫൈനലില്‍ പ്രവേശിച്ചു. ടൂര്‍ണമെന്റിലെ ടോപ് സീഡും ലോക രണ്ടാം നമ്പര്‍ താരവുമായ ചൈനയുടെ ഷിക്‌സിയാന്‍ വാങിനെയാണ് സെമി ഫൈനലില്‍ സൈന തോല്‍പിച്ചത്. സൈന ലോക ആറാം നമ്പര്‍ താരമാണ് .
ഇനി ഇന്ത്യന്‍ താരത്തിന് മുന്നില്‍ ഫൈനലിന്റെ കലാശപ്പോരാട്ടം മാത്രം ബാക്കി. ഷിക്‌സിയാനെതിരെ മുമ്പ് എട്ട് തവണ ഏറ്റുമുട്ടിയപ്പോള്‍ അഞ്ച് തവണയും സൈനക്കായിരുന്നു ജയം. ഓസ്‌ട്രേലിയന്‍ ഓപ്പണ്‍ വിജയിയെ കാത്തിരിക്കുന്നത് ഏഴര ലക്ഷം ഡോളറിന്റെ പ്രൈസ് മണിയാണ്. ഏതാണ്ട് നാലര കോടി രൂപ.

ഒരു മണിക്കൂര്‍ 16 മിനിട്ട് നീണ്ടു നിന്ന മത്സരത്തില്‍ സൈനയുടെ വാശിയേറിയ പോരാട്ടമാണ് കണ്ടത്. സ്‌കോര്‍: 21-19, 16-21, 21-15.
മത്സരം കഴിഞ്ഞ ഉടന്‍ തന്നെ സൈന തന്റെ ട്വിറ്ററില്‍ ഇങ്ങനെ കുറിച്ചു...' ലോക രണ്ടാം നമ്പര്‍ താരമായ വാങ് ഷിക്‌സിയാനെ ദുര്‍ഘടമായ മൂന്ന് ഗെയിം മത്സരത്തില്‍ തോല്‍പിച്ചു. ഇനി ഓസ്‌ട്രേലിയന്‍ ഓപ്പണ്‍ സൂപ്പര്‍ സീരീസ് ഫൈനലിലേക്ക്'
ഈ വര്‍ഷം തുടക്കത്തില്‍ ഇന്ത്യ ഓപ്പണ്‍ ഗ്രാന്റ് പ്രിക്‌സില്‍ ചാമ്പ്യനായതാണ് സൈനയുടെ ഈ സീസണിലെ പ്രധാന നേട്ടം. ഓസ്‌ട്രേലിയന്‍ ഓപ്പണില്‍ കിരീടം ഉയര്‍ത്താനായാല്‍ അത് ഇന്ത്യന്‍ കായിക ലോകത്തിന് തന്നെ അഭിമാനമാകും.