ലണ്ടന്: ഓള് ഇംഗ്ലണ്ട് ബാഡ്മിന്റണ് ചാംപ്യന്ഷിപ്പില് ഇന്ത്യന് കിരീട പ്രതീക്ഷയായ വനിതാ സൂപ്പര് താരം സൈന നെഹ് വാള് ക്വാര്ട്ടര് ഫൈനലില് തോറ്റ് പുറത്ത്. ലോക റാങ്കിങില് ഒന്നാംസ്ഥാനത്തുള്ള തായ്വാന് താരം തെയ് സു യിങാണ് സൈനയെ തോല്പ്പിച്ചത്. സ്കോര്: 15-21, 19-21. യിങിന്റെ തകര്പ്പന് സ്ട്രോക്ക് പ്ലേയ്ക്കു മുന്നില് മറുപടിയില്ലാതെയാണ് മുന് റണ്ണറപ്പ് കൂടിയായ സൈന കീഴടങ്ങിയത്. മല്സരം വെറും 37 മിനിറ്റ് കൊണ്ട് അവസാനിച്ചു.
യിങിനോട് തുടര്ച്ചയായ 13ാമത്തെ കളിയിലാണ് സൈന തോല്വി സമ്മതിക്കുന്നത്. 2015 ശേഷം യിങിനെ കീഴടക്കാന് ഇന്ത്യന് താരത്തിനായിട്ടില്ല. ഇതുവരെ 20 മല്സരങ്ങളിലാണ് ഇരുതാരങ്ങളും മുഖാമുഖം വന്നത്. ഇതില് വെറും അഞ്ചെണ്ണത്തില് മാത്രമേ സൈനയ്ക്കു വിജയിക്കാനായിട്ടുള്ളൂ.