വിസ്മയമായി വീണ്ടും പ്രണോയ്... ഇതിഹാസ താരത്തെ അട്ടിമറിച്ച് ക്വാര്‍ട്ടറില്‍, 2017ല്‍ രണ്ടാംതവണ

കോപ്പന്‍ഹേഗന്‍: ഇന്ത്യയുടെ മലയാളി താരം എച്ച്എസ് പ്രണോയ് ഡെന്‍മാര്‍ക്ക് ഓപ്പണ്‍ സൂപ്പര്‍ സീരീസ് ബാഡ്മിന്റണ്‍ ചാംപ്യന്‍ഷിപ്പില്‍ വിസ്മയ വിജയം സ്വന്തമാക്കി. മലേഷ്യയുടെ ഇതിഹാസതാരവും ടൂര്‍ണമെന്റിലെ ഏഴാം സീഡുമായ ലീ ചോങ് വെയിയെയാണ് 14ാം സീഡായ പ്രണോയ് ഞെട്ടിച്ചത്.

ലീക്കെതിരായ ജയത്തോടെ പ്രണോയ് ടൂര്‍ണമെന്റിന്റെ ക്വാര്‍ട്ടര്‍ ഫൈനലിലേക്ക് മുന്നേറുകയും ചെയ്തു. ഈ വര്‍ഷം ഇതു രണ്ടാം തവണയാണ് മലേഷ്യന്‍ സൂപ്പര്‍ താരത്തിനെതിരേ മലയാളി താരം വെന്നിക്കൊടി പാറിക്കുന്നത്. നേരത്തേ ഇന്തോനേഷ്യ ഓപ്പണിലും ലീയെ പ്രണോയ് നേരിട്ടുള്ള സെറ്റുകള്‍ക്കു തോല്‍പ്പിച്ചിരുന്നു.

ഡെന്‍മാര്‍ക്ക് ഓപ്പണ്‍ സൂപ്പര്‍ സീരീസ് പ്രീക്വാര്‍ട്ടറില്‍ പ്രണോയ്ക്ക് ജയത്തിനായി നന്നായി പൊരുതേണ്ടിവന്നു. ആദ്യ ഗെയിം പ്രണോയ് 21-17നു സ്വന്തമാക്കിയെങ്കിലും രണ്ടാം സെറ്റില്‍ 34 കാരനായ ലീ ശക്തമായ തിരിച്ചുവരവ് നടത്തി. പ്രണോയിയെ നിഷ്പ്രഭനാക്കി 11-21നാണ് രണ്ടാം ഗെയിം ലീ വരുതിയിലാക്കിയത്.

നിര്‍ണായകമായ മൂന്നാം ഗെയിമിയില്‍ ഒരു ഘട്ടത്തില്‍ ലീ 10-13നു ലീഡ് ചെയ്തങ്കിലും പ്രണോയ്ക്ക് തോല്‍ക്കാന്‍ മനസ്സുണ്ടായിരുന്നില്ല. 21-19ന് ഗെയിമും മല്‍സരവും പ്രണോയ് സ്വന്തമാക്കുകയായിരുന്നു. മല്‍സരഫലത്തില്‍ അതിയായ സന്തോഷമുണ്ടെന്ന് പ്രണോയ് പ്രതികരിച്ചു. 10-13നു പിന്നില്‍ നിന്ന ശേഷം തിരിച്ചുവരാന്‍ കഴിഞ്ഞത് അവിസ്മരണായമാണെന്നും താരം കൂട്ടിച്ചേര്‍ത്തു.